ஒரகடம் அருகே அரசியல் கட்சி பிரமுகரை கொலை செய்ய திட்டம் தீட்டிய ரவுடி உட்பட 5 பேரை போலீசார் துப்பாக்கி முனையில் கைது செய்தனர்.
காஞ்சிபுரம் மாவட்டம், ஸ்ரீபெரும்புதூர் ஒரகடம் சுற்றுவட்டார பகுதிகளில் உள்ள தொழிற்சாலைகளில் இருந்து இரும்பு கழிவுகள் எடுப்பது தொடர்பாக அந்த பகுதியில் கொலை உள்ளிட்ட குற்ற சம்பவங்கள் அரங்கேறி வருகின்றன. இதனிடையே, அரசியல் பிரமுகர் ஒருவரை கொலை செய்ய மதுரையைச் சேர்ந்த ரவுடி ராஜா தனது கூட்டாளிகளுடன் சேர்ந்து திட்டம் தீட்டுவதாக போலீசாருக்கு ரகசிய தகவல் கிடைத்தது.
இதனை தொடர்ந்து அதன் பேரில் போலீசார் தீவிரமாக கண்காணித்து வந்தனர்.இந்த நிலையில் மதுரையைச் சேர்ந்த பிரபல ரவுடி அப்பளம் ராஜா (39) என்பவன் காஞ்சிபுரம் மாவட்டம் கீழ்படப்பை பகுதியில் கூட்டாளிகளுடன் பதுங்கி இருப்பதாக போலீசாருக்கு தெரியவந்தது. இதனையடுத்து அங்கு விரைந்த மாவட்ட எஸ்.பி. சுதாகர் தலைமையிலான தனிப்படை போலீசார் அப்பளம் ராஜா உள்பட தியாகராஜன் (38), சுரேஷ்குமார் (37), தூத்துக்குடியைச் சேர்ந்த சிவகுமார் (40), படப்பை பகுதியைச் சேர்ந்த மைனர் செல்வம் (39) உள்ளிட்ட 5 பேரை போலீசார் துப்பாக்கி முனையில் கைது செய்தனர்.
பின்னர் 5 பேரையும் ஒரகடம் காவல் நிலையம் அழைத்து வந்து விசாரித்தனர். போலீஸ் விசாரணையில் ஸ்ரீபெரும்புதூர் சுற்றுவட்டார பகுதியில் உள்ள தனியார் ஆலையில் ஸ்கிராப் எனப்படும் இரும்புக் கழிவுகளை ஒப்பந்தம் எடுக்க வந்ததாகவும், தற்போது அரசியல் கட்சி முக்கிய பிரமுகர் ஒருவரை கொலை செய்ய திட்டமிட்டு இருந்ததும் போலீஸ் விசாரணையில் தெரிய வந்தது.
ஸ்கிராப் எடுப்பதில் தொழில் போட்டி ஏற்பட்டு ஸ்ரீபெரும்புதூர் பகுதியில் தொடர்ந்து கொலைகள் நடைபெற்று வரும் நிலையில் பயங்கர ஆயுதங்களுடன் பதுங்கி இருந்த 5 பேர் மீதும் கொலை முயற்சி வழக்கு பதிவு செய்த போலீசார், அவர்களிடம் இருந்து ஆயுதங்களை பறிமுதல் செய்து நீதிமன்றத்தில் ஆஜர்படுத்தி சிறையில் அடைத்தனர். மதுரையை சேர்ந்த பிரபல ரவுடி அப்பளம் ராஜா மற்றும் அவனது கூட்டாளிகள் காஞ்சிபுரம் மாவட்டம் ஒரகடம் அருகே துப்பாக்கி முனையில் கைது செய்யப்பட்ட சம்பவம் பெரும் பரபரப்பை ஏற்படுத்தியுள்ளது.
- பி.ஜேம்ஸ் லிசா
