இந்திய கிரிக்கெட் அணி நியூசிலாந்தில் சுற்றுப்பயணம் செய்து டி20, ஒருநாள் மற்றும் டெஸ்ட் தொடரில் விளையாடுகிறது. இதில் முதற்கட்டமாக இரு அணிகள் இடையேயான 5 போட்டிகள் கொண்ட டி20 தொடர் நடைபெற்று வருகிறது. இந்த தொடரின் முதல் மூன்று போட்டிகள் முடிவில் இந்திய அணி 3-0 என்ற கணக்கில் தொடரை கைப்பற்றியது.
இந்நிலையில், நியூசிலாந்து, இந்தியா இடையேயான 4வது டி20 போட்டி இன்று ஆக்லாந்தில் உள்ள மைதானத்தில் தொடங்கியது. இந்த போட்டியில் டாஸ் வென்ற இந்திய அணியின் கேப்டன் ஷ்ரேயாஸ் அய்யர் பந்துவீச்சை தேர்வு செய்தார். அதன்படி நியூசிலாந்து அணி முதலில் பேட்டிங் ஆடியது. நியூசிலாந்து அணி 20 ஓவர் முடிவில் 7 விக்கெட்டை இழந்து 259 ரன்கள் குவித்தது. அந்த அணி அதிகபட்சமாக. கிளென் பிலிப்ஸ் 49 பந்துகளில் 10 சிக்ஸர்கள் மற்றும் 6 ஃபோர்களுடன் 107 ரன்கள் குவித்தார். அதேபோல மைக்கேல் பிரேஸ்வெல் 25 பந்துகளில் 65 ரன்கள் குவித்தார். இந்திய அணி சார்பில் மயங்க் யாதவ் 3 விக்கெட்டுகளையும், அர்ஷ்தீப் சிங், இளவரசர் யாதவ், நிதிஷ் குமார் ரெட்டி, அக்சர் படேல் ஆகியோர் தலா ஒரு விக்கெட்டையும் வீழ்த்தினர்.
இதனைத்தொடர்ந்து 260 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணியின் தொடக்க வீரர்களான சஞ்சு சாம்சன் 4 ரன்களிலும், இஷான் கிஷன் ரன் ஏதும் எடுக்காமலும் ஆட்டமிழந்தனர். சிறிது நேரம் தாக்குப்பிடித்த அபிஷேக் சர்மா 27 ரன்கள் எடுத்த நிலையில் வெளியேறினார். தொடர்ந்து வந்த கேப்டன் ஷ்ரேயாஸ் அய்யர் 22 ரன்களிலும், அக்சர் படேல் 7 ரன்களிலும் ஆட்டமிழந்தனர். நிதிஷ் குமார் ரெட்டி 21 ரன்களும், நமன் தீர் 28 ரன்களும் எடுத்து வெளியேறினர். மறுமுனையில் போராடிய திலக் வர்மா 35 ரன்கள் எடுத்த நிலையில் ஆட்டமிழந்தார். நியூசிலாந்து தரப்பில் ஜேக்கப் டப்பி 4 விக்கெட்டுகளைக் கைப்பற்றி அசத்தினார்.
இறுதியில் இந்திய அணி 20 ஓவர்கள் முடிவில் 9 விக்கெட் இழப்புக்கு 172 ரன்கள் மட்டுமே எடுத்து தோல்வியடைந்தது. இதன் மூலம் நியூசிலாந்து அணி 87 ரன்கள் வித்தியாசத்தில் அபார வெற்றி பெற்றது. இதனால் 5 போட்டிகள் கொண்ட டி20 தொடரில் இந்திய அணி 3-1 என்ற கணக்கில் முன்னிலை வகிக்கிறது.
