புதுக்கோட்டை மாவட்டம் , கறம்பக்குடி அருகே குடிநீர் வழங்கக் கோரி
பெண்கள் காலி குடங்களுடன் திடீர் சாலை மறியல் போராட்டத்தில் ஈடுபட்டனர்.
புதுக்கோட்டை மாவட்டம், கந்தர்வக்கோட்டை தாலுகா ஆத்தங்கரை விடுதி ,
கீழ வாண்டான் விடுதி கிழக்குத் தெருவில் சுமார் 50-க்கும் மேற்பட்ட குடும்பங்கள்
வசித்து வருகின்றன. இந்நிலையில், அங்கு செயல்பட்டு வந்த 10,000 லிட்டர்
கொள்ளளவு கொண்ட மேல்நிலை நீர்த்தேக்க தொட்டியின் ஆழ்குழாய் மோட்டார் ,
கடந்த இரண்டு ஆண்டுகளுக்கு முன்பு பழுதடைந்த நிலையில் , ஊராட்சி நிர்வாகம்
அந்த குழாய்களை சீரமைக்கப்படாமல் காலம் தாழ்த்தி வருவதாகக் கூறப்படுகிறது.
இது சம்பந்தமாக சம்பந்தப்பட்ட அதிகாரிகளிடம் பலமுறை மனுக்கள் அளித்தும்
எந்த ஒரு நடவடிக்கும் எடுக்கப்படவில்லை . இந்நிலையில், அப்பகுதியை சேர்ந்த
கிராம மக்கள் அருகே உள்ள கிராமத்தில் குடிநீர் எடுத்து வருகின்றனர். தற்பொழுது
வெயில் காலம் என்பதால் அந்த கிராமத்திலும் குடிநீர் பற்றாக்குறை ஏற்பட்டுள்ளது .
இந்நிலையில் , இரு கிராமத்தினர் இடையே வாக்குவாதம் ஏற்படுவதாகவும்
கூறப்படுகிறது.
மேலும், குடிநீர் இல்லாமல் தங்களது குழந்தைகளை பள்ளி கல்லூரிகளுக்கு
அனுப்புவதற்கு பெரும் சிரமம் அடைந்து வருகின்றனர். இதனால் ஆத்திரமடைந்த
அப்பகுதி பெண்கள் ஊராட்சி நிர்வாகத்தை கண்டித்தும் , குடிநீர்
பிரச்னையை போக்கிட கோரியும் காலி குடங்களுடன் புதுப்பட்டியில் திடீர் சாலை
மறியலில் ஈடுபட்டனர்.
அவர்களிடம் கறம்பக்குடி போலீசார் பேச்சுவார்த்தையில் ஈடுபட்டனர். இதனால் ,
அப்பகுதியில் ஒரு மணி நேரத்திற்கு மேலாக போக்குவரத்து பாதிப்பு ஏற்பட்டது.
இந்நிலையில், காவல்துறையினர் சாலை மறியலில் ஈடுபட்டவர்களுடன்
பேச்சுவார்த்தை நடத்தியதை தொடர்ந்து, போராட்டத்தை தற்காலிகமாக ஒத்தி வைத்து
கலைந்து சென்றனர்.
—கு.பாலமுருகன்
