தமிழ்நாடு காங்கிரஸ் கமிட்டியின் முன்னாள் தலைவர் கக்கனின் வாழ்க்கை வரலாற்றை மையமாக கொண்டு இயக்கப்பட்ட படத்தின் டிரைலர் வெளியானது.
சுதந்திரப் போராட்ட வீரரும், தமிழ்நாடு காங்கிரஸ் கமிட்டியின் முன்னாள் தலைவராகவும் இருந்தவர் கக்கன். இவர் 3 முறை தமிழ்நாட்டின் அமைச்சராக இருந்துள்ளார். விடுதலைப் போராட்ட வீரர், நாடாளுமன்ற உறுப்பினர், சட்டமன்ற உறுப்பினர் என பலவகையிலும் நாட்டிற்காக சேவை புரிந்த கக்கன் 1981ம் ஆண்டு உடல்நலக்குறைவால் அரசு மருத்துமனையில் இறந்தார்.
அவர் மறைந்து பல ஆண்டுகள் ஆன நிலையிலும் இன்றைய தலைமுறையினருக்கு அவரின் நேர்மையான வாழ்க்கைக்காக நினைவுப்படுத்தப்படுகிறார். இவரின் 116-ம் ஆண்டு பிறந்தநாள் விழா கடந்த ஜூலை 18ம் தேதி தமிழ்நாடு காங்கிரஸ் அலுவலகமான சத்தியமூர்த்தி பவனில் நடைபெற்றது. இந்த விழாவில் கக்கனின் வாழ்க்கை வரலாற்றை மையமாக கொண்டு இயக்கப்பட்டுள்ள திரைப்படத்தின் போஸ்டர் வெளியிடப்பட்டது.
கக்கன் திரைப்படத்தை சங்கர் மூவீஸ் இண்டர்நேஷனல் நிறுவனத்தை சேர்ந்த ஜோசப் பேபி தயாரித்துள்ளார். இதில் கதை, திரைக்கதை, வசனம் ஆகியவற்றை எழுதியதுடன் கக்கன் கதாபாத்திரத்தில் ஜோசப் பேபி நடித்துள்ளார். பிரபு மாணிக்கம் மற்றும் ரகோத் விஜய் ஆகியோர் இந்த படத்தை இயக்கியுள்ளனர். இசையமைப்பாளர் தேவா இசையமைத்துள்ளார்.
“கக்கன்” திரைப்பட ஆடியோ மற்றும் டிரைலர் வெளியீட்டு விழா, சென்னை தேனாம்பேட்டை காமராஜர் அரங்கத்தில் இன்று நடைபெற்றது. இந்த நிகழ்ச்சியில் தமிழ்நாடு முதலமைச்சர் மு.க ஸ்டாலின் கலந்து கொண்டார். இந்த நிகழ்சியில் அமைச்சர்கள் துரைமுருகன் , சாமிநாதன், தமிழ்நாடு காங்கிரஸ் கமிட்டி தலைவர் கேஎஸ் அழகிரி , காங்கிரஸ் எம் எல் ஏ .ஈவிகேஸ் இளங்கோவன், இசையமைப்பாளர் தேவா ஆகியோர் கலந்து கொண்டனர்.
