லோகேஷ் கனகராஜ் இயக்கத்தில் உருவாகிவரும் லியோ திரைப்படம் LCU-ல் இணைந்துள்ளது போல் கைதி வில்லன் ஒரு போஸ்ட்டை வெளியிட்டுள்ளார்.
தமிழ் சினிமாவில் பிரபல நடிகரான விஜய் தற்போது லோகேஷ் கனகராஜ் இயக்கத்தில் லியோ என்ற ஆக்ஷன் திரில்லர் திரைப்படத்தில் நடித்து வருகிறார். இந்த படத்தின் முதற்கட்ட சூட்டிங் காஷ்மீரில் விறுவிறுப்பாக நடைபெற்று முடிந்துள்ளது. இப்படத்தில் த்ரிஷா, பிரியா ஆனந்த், கவுதம் மேனன், மன்சூர் அலிகான், அர்ஜுன், கதிர் உள்ளிட்ட பலர் நடிக்கிறார்கள். மேலும் மிஷ்கின், சஞ்சய் தத் இருவரும் வில்லன்களாக நடிப்பதாகவும் தகவல்கள் வெளியாகின.
செவன் ஸ்கிரீன் ஸ்டுடியோஸ் நிறுவனத்தின் தயாரிப்பில் அனிருத்தின் இசையில் இந்த திரைப்படம் உருவாகி வருகிறது. மேலும் இந்த படத்தில் விஜய்க்கு ஜோடியாக 14 ஆண்டுகளுக்குப் பிறகு த்ரிஷா நடிக்கிறார். இந்த படத்தின் கேரள மாநில வெளியீட்டு விநியோக உரிமை ரூ.16 கோடிக்கு விற்பனை செய்யப்பட்டுள்ளதாகவும், வெளிநாட்டு உரிமம் ரூ.60 கோடிக்கு விற்கப்பட்டுள்ளதாகவும் கூறப்படுகிறது.
இப்படம் வெளியீட்டிற்கு முன்பே ஓடிடி, இசை உரிமம், விநியோக உரிமம் என ரூ.350 கோடி ரூபாய்க்கு மேல் வருவாய் ஈட்டியுள்ளதாகவும் கூறப்படுகிறது. லோகேஷ் – விஜய் கூட்டணியில் உருவாகி வரும் இந்த படத்தின் எதிர்பார்ப்பு, அவ்வப்போது வரும் சில அப்டேட்டுகளால் அதிகரித்துக் கொண்டே வருகிறது.
அந்த வகையில், விஜய்யின் பிறந்தநாளான ஜூன் 22-ம் தேதியன்று லியோ படத்தின் கிளிம்ப்ஸ் விடியோவை வெளியிட படக்குழு முடிவு செய்துள்ளதாகவும், இந்த விடியோவிற்கு நடிகர் கமல்ஹாசன் பின்னணிக் குரல் கொடுக்க உள்ளதாகவும் தகவல் வெளியாகியுள்ளது. ஏற்கனவே மணிரத்தினம் இயக்கத்தில் உருவான பொன்னியின் செல்வன் படத்திற்கு பின்னணி குரல் கமல் கொடுத்திருந்தார்.
இந்நிலையில், ‘லியோ’ திரைப்படத்தையும் ‘விக்ரம்’ திரைப்படத்தையும் இணைக்கும் வகையில் மீம் ஒன்று இணையத்தில் வைரலாகி வருகிறது. இதனை தனது சமூக வலைதளத்தில் பகிர்ந்துள்ள நடிகர் ஹரிஷ் உத்தமன் ‘நல்லா இருக்கும் இல்லையா’ என்று பதிவிட்டுள்ளார்.
இந்த பதிவு தற்போது சமூக வலைதளத்தில் வைரலாகி வருகிறது. இதன் மூலம் லியோ படம் LCU -வில் இருக்கிறதா என்ற கேள்வியை சமூக வலைத்தளங்களில் ரசிகர்கள் கேட்டு வருகின்றனர்.
