ரகுவும் பொம்மியும் யானைக்குட்டிகள்.. பொம்மனும் பெள்ளியும் அவற்றை பராமரிப்பவர்கள்.. ஆனால் பாசப்பிணைப்பில் இவர்கள் அனைவரின் உணர்வும் ஒன்று.. இதனை ஆவணப்படுத்திய கார்டிகி கோன்ஸால்விஸ் அனைவரின் இதயங்களையும் வென்றிருக்கிறார்.
’தி எலிஃபன்ட் விஸ்பரர்ஸ்’ குனீத் மொங்கா தயாரிப்பில், ஊட்டியை சேர்ந்த கார்டிகி கோன்ஸால்விஸ் இயக்கத்தில் ஓ.டி.டி. தளத்தில் வெளியான ஆவணப்படம். லாஸ் ஏஞ்சல்ஸில் நடைபெற்றுவரும் ஆஸ்கர் விருது விழாவில் சிறந்த குறும்படத்திற்கான விருதைப் பெற்றிருக்கிறது இந்த ஆவணப்படம். இந்தியாவிலிருந்து முதன்முதலாக குறும்படத்திற்கான ஆஸ்கர் விருதை வென்றிருக்கிறது ’’தி எலிஃபன்ட் விஸ்பரர்ஸ்’.
ஊட்டியில் பிறந்து, கோவையில் இளங்கலை பயின்ற கார்டிகி அனிமல் பிளானட், டிஸ்கவரி உள்ளிட்ட தொலைக்காட்சி நிறுவனங்களில் கேமரா ஆபரேட்டராக பணியாற்றியவர். ஆசியாவின் மிகப்பெரிய வளர்ப்பு யானைகள் முகாமான முதுமலை தெப்பக்காட்டில், பணிபுரியும் தம்பதியர் பொம்மன் மற்றும் பெள்ளி குறித்து ஆவணப்படம் எடுக்கத் திட்டமிட்டு களத்தில் இறங்குகிறார் கார்டிகி.
அங்கே ரகு, பொம்மிக்கு இடையே இவர்கள் கொண்டிருந்த பாசப்பிணைப்பு கார்டிகியின் உள்ளத்தைக் கவர அதை அப்படியே ஆவணப்படுத்துகிறார்.
கிருஷ்ணகிரி அருகே கடந்த 2017 ஆம் ஆண்டு தாயைப் பிரிந்து காயங்களுடன் சுற்றித் திரிந்த குட்டியானை வனத்துறையினரால் மீட்கப்பட்டு தெப்பக்காடு முகாமிற்கு அழைத்து வரப்படுகிறது. அதற்கு ரகு என பெயரிட்டு பெற்ற பிள்ளைபோல் பராமரிக்கின்றனர் பொம்மனும், பெள்ளியும்.
அதேபோல, 2019 ஆம் ஆண்டு முகாமிற்கு கொண்டுவரப்பட்ட யானைக்குட்டிக்கு பொம்மி என பெயரிட்டு, இரண்டு யானைக்குட்டிகளும் தாயைப் பிரிந்த சோகம் அறியாமல் பார்த்துக் கொண்டனர் இந்த தம்பதியர்.
இந்த பாசப் பிணைப்பை மிகைப்படுத்தாமல் படமாக்கி இருந்தார் கார்டிகி. கடந்த ஆண்டு ஓ.டி.டி. தளத்தில் வெளியான இந்த ஆவணப்படம் ஆஸ்கருக்கு பரிந்துரைக்கப்பட்டது.
இந்நிலையில், லாஸ் ஏஞ்சல்ஸ் நகரில் நடைபெற்ற ஆஸ்கர் விருது விழாவில் நீலகிரி ஏஞ்சல்ஸ் விருதுக்கு தகுதியுடையவர்களாக தேர்ந்தெடுக்கப்பட்டு, பாராட்டுகளை குவித்து வருகின்றனர்.
