தமிழ்நாட்டை சேர்ந்த கல்லூரி மாணவர்களுக்கு ராஜஸ்தான் இளைஞர்கள் சங்கத்தினர் இலவச புத்தகங்களை வழங்கி உதவியுள்ளனர். 60 ஆண்டுகளாக வழங்கி வரும் இந்த சேவை அனைவரையும் திரும்பி பார்க்க வைத்துள்ளது.
ராஜஸ்தான் இளைஞர்கள் சங்கத்தின் கல்வி டிரஸ்ட் சார்பில் 60 ஆவது ஆண்டு புத்தக
விநியோக வைர விழா நிகழ்ச்சி சென்னை கலைவாணர் அரங்கத்தில் நடைபெற்றது. அப்போது சென்னை, திருவள்ளூர், காஞ்சிபுரம் மற்றும் செங்கல்பட்டு மாவட்டங்களை சேர்ந்த 150 க்கும் மேற்பட்ட கல்லூரிகளை சேர்ந்த ஆயிரத்திற்கும் மேற்பட்ட
மாணவர்களுக்கு இலவச புத்தகங்கள் வழங்கப்பட்டது.
பொறியியல், கலை அறிவியல் என இலவச புத்தகங்கள் பெற பதிவு செய்யும் மாணவர்களின் துறை சார்ந்து அவர்கள் தேவைக்கு ஏற்ப ஒருவருக்கு 4 முதல் 5 புத்தகங்கள் வழங்கப்படுகிறது. முதலாமாண்டு ஒரு மாணவர் இதற்கு பதிவு செய்தால் அவர் கல்லூரி படிப்பு முடியும் வரை இலவச புத்தகங்ககள் வழங்கப்படுகிறது. ஒவ்வொரு ஆண்டும் புதிதாக 2000 மாணவர்கள் இந்த சங்கம் மூலம் பயன் பெறுகின்றனர்.
இந்த நிகழ்ச்சியில் ராஜஸ்தான் இளைஞர்கள் சங்கத்தின் தலைவர் ஷ்ரேயன்ஸ் சேதியா,
புக் பேங்க் சேர்மன் ராஜேஷ் குமார், நிர்வாக இயக்குநர் சங்கவி ரமேஷ் முத்தா
உள்ளிட்டோர் பங்கேற்றனர். இது குறித்து பேசிய ராஜஸ்தான் இளைஞர்கள் சங்கத்தின் புக் பேங்க் சேர்மன் ராஜேஷ் குமார், மாணவர்கள் கல்லூரிகளில் சேர்கின்றனர். ஆனால் புத்தகங்கள் விலை அதிகமாக இருப்பதால் வாங்க சிரமப்படுகிறார்கள். அதற்காக தான் ராஜஸ்தான் இளைஞர்கள் சங்கத்தின் சார்பில் இலவச புத்தகங்ககள் வழங்கி வருகிறோம்.
முதலாமாண்டு புத்தகம் வாங்கி செல்பவர்கள் அதனை திரும்ப கொடுத்துவிட்டு
இரண்டாம் ஆண்டுக்கான புத்தகங்கள் வாங்கி செல்கின்றனர்.
கல்லூரிகளுக்கு நேரில் சென்று இது பற்றி தெரிவிக்கிறோம், கல்லூரி முதல்வர்களும் எங்களுக்கு உதவியாக உள்ளனர் என்று தெரிவித்தார். இது போல், இலவச புத்தகங்கள் அளிப்பது மூலம் கல்லூரி படிப்புக்கு உதவியாக உள்ளது என்று கல்லூரி மாணவி சண்முகப்பிரியா தெரிவித்தார்.
