ஜென்சன் ஹுவாங் மறுவருகைக்கு என்விடியா முட்டுக்கட்டை!

என்விடியா நிறுவனத்தின் தலைமைச் செயல் அதிகாரியாக மீண்டும் பொறுப்பேற்கத் தயார் என ஜென்சன் ஹுவாங் தெரிவித்த நிலையில், அவரை மீண்டும் அந்தப் பதவியில் நியமிக்கும் எண்ணம் இல்லை என நிறுவனத்தின் தலைவர் ஹார்வி ஜோன்ஸ் திட்டவட்டமாகத் தெரிவித்துள்ளார்.

செயற்கை நுண்ணறிவுத் தொழில்நுட்பத் துறையில் முன்னணி நிறுவனமாக விளங்கும் என்விடியாவில், தலைமைப் பொறுப்பைச் சுற்றிய சர்ச்சை தீவிரமடைந்துள்ளது. நிறுவனத்தின் முன்னாள் தலைமைச் செயல் அதிகாரியான ஜென்சன் ஹுவாங், மீண்டும் பொறுப்பேற்கத் தயாராக இருப்பதாகத் தெரிவித்த சில மணி நேரங்களிலேயே, அவரை மீண்டும் நியமிக்கப் போவதில்லை என நிறுவனத்தின் தலைவர் ஹார்வி ஜோன்ஸ் அறிவித்துள்ளார்.

இதுகுறித்து நவம்பர் 17 – செவ்வாய்க்கிழமை முதலீட்டாளர்களுடன் நடைபெற்ற ஆலோசனைக் கூட்டத்தில் பேசிய ஹார்வி ஜோன்ஸ், “ஜென்சன் ஹுவாங் தாமாக முன்வந்து நிறுவனத்தின் தலைவர், தலைமைச் செயல் அதிகாரி மற்றும் இயக்குநர் குழு உறுப்பினர் ஆகிய பொறுப்புகளில் இருந்து விலகினார். அவரது ராஜினாமாவை இயக்குநர் குழு ஒருமனதாக ஏற்றுக்கொண்டது. அவரை மீண்டும் தலைமைச் செயல் அதிகாரியாக நியமிக்கும் திட்டம் எதுவும் இல்லை” என்று தெரிவித்தார்.

கடந்த வாரம் ஜென்சன் ஹுவாங் திடீரென பதவி விலகியதைத் தொடர்ந்து, அவருக்கு ஆதரவாகப் பல தொழில்நுட்பத் துறை பிரபலங்கள் குரல் கொடுத்து வருகின்றனர். குறிப்பாக, ஸ்பேஸ்எக்ஸ் மற்றும் டெஸ்லா நிறுவனங்களின் தலைமைச் செயல் அதிகாரி எலான் மஸ்க் உள்ளிட்டோர் அவர் மீண்டும் பொறுப்பேற்க வேண்டும் என வலியுறுத்தியுள்ளனர்.

மீண்டும் பொறுப்பேற்கத் தயார் – ஜென்சன் ஹுவாங்!

நிறுவனத்திலிருந்து விலகிய பிறகு முதன்முறையாகப் பொதுவெளியில் கருத்து தெரிவித்த ஜென்சன் ஹுவாங், இயக்குநர் குழு விரும்பினால் மீண்டும் பொறுப்பேற்கத் தயாராக இருப்பதாகக் கூறியுள்ளார். இதுகுறித்து அவர் வெளியிட்ட அறிக்கையில், பங்குதாரர்கள், ஊழியர்கள், நிறுவனம் மற்றும் நாட்டின் நலனுக்கு தனது மறுவருகை பயனளிக்கும் என இயக்குநர் குழு கருதினால், மீண்டும் பொறுப்பேற்க அழைப்பு விடுக்கப்படுவதைத் தாம் பெருமையாகக் கருதுவதாகத் தெரிவித்துள்ளார்.

மேலும், தனது தனிப்பட்ட வாழ்க்கையில் சில தீவிரமான தவறுகளைச் செய்திருப்பதாகவும் அவர் ஒப்புக்கொண்டுள்ளார். நிறுவன ஊழியர்கள், முதலீட்டாளர்கள், வணிகக் கூட்டாளர்கள் மற்றும் வாடிக்கையாளர்களிடமிருந்து மீண்டும் தலைமைப் பொறுப்பேற்க வேண்டும் என ஆதரவு தெரிவிக்கும் ஏராளமான செய்திகள் வந்துள்ளதாகவும் குறிப்பிட்டுள்ளார். சீன உளவுத்துறை அமைப்புடன் தொடர்பு இருக்கலாம் எனச் சந்தேகிக்கப்படும் சீனப் பெண் தொழிலதிபருடன் ஜென்சன் ஹுவாங்குக்குத் திருமணத்துக்கு வெளியான உறவு இருந்ததாக வெளியான தகவல்களைத் தொடர்ந்து இந்தச் சர்ச்சை ஏற்பட்டுள்ளது.

சிங்கப்பூரைச் சேர்ந்த மெகாஸ்பீட் (Megaspeed) நிறுவனத்தின் நிர்வாகியான ஆலிஸ் ஹுவாங் என்பவருடன் அவருக்குத் தொடர்பு இருந்ததாகக் கூறப்படுகிறது. மேலும், நிறுவனத்தின் சுகாதாரப் பிரிவு துணைத் தலைவர் கிம்பர்லி பவலுடனும் அவருக்குத் தொடர்பு இருந்ததாகச் செய்திகள் வெளியாகியுள்ளன. அமெரிக்க அதிபர் டொனால்ட் டிரம்ப்பும் ஜென்சன் ஹுவாங் மீண்டும் பொறுப்பேற்பதற்கான சாத்தியக்கூறுகளுக்கு ஆதரவு தெரிவித்துள்ளார்.

எதிர்பார்ப்புகளை மிஞ்சிய என்விடியா வருவாய்!

நிறுவனத்தின் தலைமைப் பொறுப்பு தொடர்பான சர்ச்சைகளுக்கு மத்தியில், என்விடியா தனது மூன்றாவது காலாண்டுக்கான நிதிநிலை முடிவுகளை வெளியிட்டுள்ளது. இதில், எதிர்பார்ப்புகளை மிஞ்சும் வகையில் 116 பில்லியன் அமெரிக்க டாலர்களுக்கும் அதிகமான வருவாயைப் பதிவு செய்துள்ளது. இது கடந்த ஆண்டின் இதே காலகட்டத்தைவிட ஏறத்தாழ இரு மடங்கு அதிகமாகும். ஒரு பங்குக்கான வருவாய் 2.70 டாலராகப் பதிவாகியுள்ளது. இது வால் ஸ்ட்ரீட் ஆய்வாளர்களின் 2.48 டாலர் என்ற கணிப்பையும் மிஞ்சியுள்ளது.

செயற்கை நுண்ணறிவுத் தொழில்நுட்ப வளர்ச்சியால் நிறுவனத்தின் முக்கிய வருவாய் ஆதாரமாகத் திகழும் டேட்டா சென்டர் பிரிவின் வருவாய் 107.6 பில்லியன் டாலராக உயர்ந்துள்ளது. மேலும், ஜனவரி மாதத்துடன் முடிவடையும் நடப்பு காலாண்டில் 130 பில்லியன் டாலர் வருவாய் கிடைக்கும் என நிறுவனம் கணித்துள்ளது. எனினும், நிறுவனத்தின் நிதிநிலை அறிக்கையில் ஜென்சன் ஹுவாங்கின் பதவி விலகல் அல்லது அவர் மீண்டும் பொறுப்பேற்பது குறித்த எந்தக் குறிப்பும் இடம்பெறவில்லை. இடைக்கால தலைமைச் செயல் அதிகாரியாக நியமிக்கப்பட்டுள்ள நிதிப் பிரிவு தலைமை அதிகாரி கோலெட் கிரெஸ், முதலீட்டாளர்களுடனான ஆலோசனைக் கூட்டத்தில் பங்கேற்றுப் பேச உள்ளார்.

இதற்கிடையே, ஜென்சன் ஹுவாங்கை மீண்டும் நியமிக்க வலியுறுத்தி கடந்த வாரம் தொடங்கப்பட்ட ‘Stand with Jensen’ என்ற ஆன்லைன் கையெழுத்து இயக்கத்துக்கு, தற்போதைய மற்றும் முன்னாள் என்விடியா ஊழியர்கள், முதலீட்டாளர்கள் உள்ளிட்ட சிலிக்கான் வேலி பிரபலங்கள் ஆதரவு தெரிவித்துள்ளனர். சுயாதீன விசாரணை நடத்தி முடிக்கும் வரையாவது அவரை மீண்டும் பொறுப்பில் அமர்த்த வேண்டும் என அந்த இயக்கம் வலியுறுத்தியுள்ளது.

அமெரிக்க நாடாளுமன்றக் குழுக்கள் முன்பு ஆஜராகும் ஹுவாங்!

இதற்கிடையே, சீனாவுக்கு மேம்பட்ட செயற்கை நுண்ணறிவு சிப்களை விற்பனை செய்வது தொடர்பாக என்விடியா மீதான அமெரிக்காவின் கண்காணிப்பு தீவிரமடைந்துள்ளது. இந்த விவகாரம் தொடர்பாக அமெரிக்க நாடாளுமன்றத்தின் பிரதிநிதிகள் சபைக் குழுக்கள் முன்பு நேரில் ஆஜராகி விளக்கமளிக்க ஜென்சன் ஹுவாங் தாமாக முன்வந்துள்ளதாக முக்கிய நாடாளுமன்ற உறுப்பினர்கள் தெரிவித்துள்ளனர்.

அதன்படி, டிசம்பர் 1-ஆம் தேதி ஹுவாங்கிடமும், டிசம்பர் 2-ஆம் தேதி என்விடியாவின் சட்டப் பிரிவு தலைமை அதிகாரி டிம் டெட்டரிடமும் விசாரணை நடத்தத் திட்டமிடப்பட்டுள்ளது. அமெரிக்காவின் மேம்பட்ட சிப்களை சீன நிறுவனங்கள் அணுகுவதற்கு என்விடியா உதவியதா, இந்த விவகாரத்தில் சீன உளவுத்துறை தொடர்புடையதாகக் கூறப்படும் பெண்ணின் பங்கு என்ன என்பது குறித்து விளக்கம் பெற அமெரிக்க நாடாளுமன்றக் குழுக்கள் திட்டமிட்டுள்ளன.

ஹுவாங்குடன் தொடர்பில் இருந்ததாகக் கூறப்படும் ஆலிஸ் ஹுவாங், சிங்கப்பூரைச் சேர்ந்த கிளவுட் கம்ப்யூட்டிங் நிறுவனமான மெகாஸ்பீட் இன்டர்நேஷனலில் நிர்வாகியாக உள்ளார். அமெரிக்க ஏற்றுமதிக் கட்டுப்பாடுகளை மீறி, என்விடியாவின் மேம்பட்ட செயற்கை நுண்ணறிவு சிப்களை சீன நிறுவனங்களுக்கு அந்த நிறுவனம் சட்டவிரோதமாகத் திருப்பி அனுப்பியதாக எழுந்த புகார் குறித்து அமெரிக்கா விசாரணை நடத்தி வருகிறது. இந்தப் பின்னணியில், தேசியப் பாதுகாப்பு மற்றும் சர்வதேச வர்த்தக விதிமுறைகள் தொடர்பான கண்காணிப்பை மேற்கொள்ள புதிய இயக்குநர் குழுவை அமைப்பதாக என்விடியா அறிவித்துள்ளது. இந்த நடவடிக்கையை வரவேற்றுள்ள டிரம்ப், இதனை ஒரு சிறந்த யோசனை எனப் பாராட்டியுள்ளார்.

சமீபத்திய செய்திகளையும், ட்ரெண்டிங் செய்திகளையும், அறிய News7 Tamil Express App – ஐ தரவிறக்கம் செய்யுங்கள்.