உலககோப்பை கால்பந்து கோப்பையுடன் அர்ஜென்டினா அணியின் கேப்டன் லியோனல் மெஸ்ஸி, இன்ஸ்டாகிராமில் பதிவிட்ட புகைப்படம், ஆறு கோடிக்கும் அதிகமான லைக்குகளை பெற்று சாதனை படைத்துள்ளது.

கால்பந்து என்றாலே, அது உள்ளூர் போட்டியானாலும், உலக கோப்பை போட்டியானாலும், அதிக வரவேற்பை பெறும். சமீபத்தில் கத்தார் நாட்டில் நடைபெற்ற கால்பந்து உலகக்கோப்பை போட்டியில் அர்ஜென்டினா, முன்னாள் சாம்பியனான பிரான்ஸ் அணியை வென்று உலகக்கோப்பையை உச்சி முகர்ந்தது.

இதற்கு முன்பாக 1978 மற்றும் 1986-ஆம் ஆண்டுகளில் உலக கோப்பையை வென்ற அர்ஜென்டினா அணி, தற்போது 3-வது முறையாக மகுடம் சூடியுள்ளது. மேலும் இரண்டு ஃபிஃபா ‘கோல்டன் பால்’ விருதுகளை வென்ற முதல் கால்பந்து வீரர் என்ற பெருமையை மெஸ்ஸி பெற்றுள்ளார்.

கத்தாரில் உலக கோப்பையை பெறும் போது அர்ஜெண்டினா அணிக்கு பெருந்திரளான ரசிகர்கள் கூடி ஆரவாரம் செய்தனர். பிறகு தாயகம் திரும்பிய அர்ஜெண்டினா கால்பந்து அணியை லட்சக்கணக்கான மக்கள் ஒன்று கூடி வரவேற்பு அளித்து திக்கு முக்காட வைத்தனர்.

36 ஆண்டுகளுக்கு பின்பு உலக கோப்பையை வென்றதை ஒட்டு மொத்த அர்ஜென்டினா மக்களும், உலகெங்கும் உள்ள கால்பந்து ரசிகர்களும் கொண்டாடி வருகின்றனர். இதற்கு ஒரு படி மேலாக, மெஸ்ஸி இன்ஸ்டாகிராமில் பதிவிட்ட ஒரு பதிவுக்கு 6 கோடிக்கும் அதிகமானோர் லைக்ஸ்களை தெறிக்க விட்டுள்ளனர். விளையாட்டு வீரர் ஒருவரின் பதிவுக்கு கிடைத்த அதிகபட்ச லைக்ஸ் இதுவாகும்.

கோப்பையை வென்ற பின்பு ஆனந்த கண்ணீரில் மூழ்கிய மெஸ்ஸி, புகைப்படத்துடன் வெளியிட்ட பதிவில், “நான் பல முறை கனவு கண்டேன், நான் அதை மிகவும் விரும்பினேன், நான் இன்னும் விழவில்லை, என்னால் அதை நம்ப முடியவில்லை….. என் குடும்பத்தினருக்கும், நாட்டு மக்களுக்கும், ரசிகர்களுக்கும் என்னை ஆதரித்த அனைவருக்கும் மிக்க நன்றி என குறிப்பிட்டிருந்தார்.

சில மணிநேரங்களில், மெஸ்ஸியின் இன்ஸ்டாகிராம் பதிவு, அதிகம் விரும்பப்பட்ட விளையாட்டு வீரரின் பதிவு என சாதனை படைத்தது. இதற்கு முன்பு, போர்ச்சுகல் நாட்டின் கால்பந்தாட்ட வீரர் கிறிஸ்டியானோ ரொனால்டோ, மெஸ்ஸியுடன் சதுரங்கம் விளையாடுவது போன்ற புகைப்படம், 4 கோடியே 20 லட்சம் லைக்குகளை பெற்றிருந்த நிலையில், அதனை மெஸ்ஸியின் பதிவு முறியடித்து சாதனை படைத்துள்ளது.