மெட்ரோ ரயிலில் திருமண போட்டோஷூட் நடத்த கொச்சி மெட்ரோ ரயில் நிர்வாகம் அனுமதி அளித்துள்ளது.
ப்ரீவெட்டிங் ஷுட், போஸ்ட் வெட்டிங் ஷுட் என திருமண நிகழ்ச்சிகளில் போட்டோஷுட் என்பது தவிர்க்க முடியாத ஒன்றாக மாறிவருகிறது. இந்நிலையில், மெட்ரோ ரயிலை லாபகரமானதாக மாற்றும் நோக்கில், மெட்ரோ ரயிலில் போட்டோஷுட் நடத்தலாம் என கொச்சி நிர்வாகம் புதிய அறிவிப்பை வெளியிட்டுள்ளது.
முன்னதாக, திரைப்படங்கள் மற்றும் விளம்பரங்களின் படப்பிடிப்புகளுக்கு மட்டுமே அனுமதி அளிக்கப்பட்டன. இந்நிலையில் தற்போது திருமண போட்டோஷூட்களுக்கு குறைவான கட்டணத்தில் அனுமதி அளிக்கப்படுகிறது. அந்த வகையில் ஒரு மெட்ரோ ரயில் பெட்டிக்கு அதிகபட்சமாக 2 மணி நேரத்துக்கு முன்பதிவு செய்யலாம், நிற்கும் ரயிலில் போட்டோஷுட் எடுக்க 5 ஆயிரம் ரூபாயும், ஓடும் ரயிலில் எடுக்க 8 ஆயிரம் ரூபாயும் கட்டணம் செலுத்த வேண்டும் என அறிவிக்கப்பட்டுள்ளது. இந்த போட்டோஷுட் எடுக்க ரூ.10 ஆயிரம் வைப்புத் தொகையாக செலுத்த வேண்டும்.
மேலும், 3 மெட்ரோ ரயில் பெட்டிகள் வேண்டுமானால் நிற்கும் ரயிலில் 2 மணி நேரத்துக்கு ரூ.12 ஆயிரம் செலுத்த வேண்டும். ஓடும் ரயிலுக்கு ரூ.17,500 செலுத்த வேண்டும். வைப்புத் தொகையாக ரூ. 25 ஆயிரம் வசூலிக்கப்படுகிறது. இந்த ரயில் ஆலுவாவில் இருந்து பெட்டா வரை இயக்கப்படும். இந்த சேவை ரயில் ஆலுவாவில் இருந்து பெட்டா வரை இயக்கப்படும் எனத் தெரிவிக்கப்பட்டுள்ளது.
கொச்சி மெட்ரோ ரயில் நிர்வாகத்தின் இந்த அறிவிப்பு கேரள மாநில மக்களிடையே வரவேற்பைப் பெற்றுள்ளது.
