நடிகர் வடிவேலுவின் இத்தனை ஆண்டுகால திரை பயணத்துக்கான பரிசாக மாமன்னனுக்காக அவருக்கு தேசிய விருது கொடுப்பதே சிறந்த கெளரவமாக அமையும் என இயக்குநர் விக்னேஷ் சிவன் தெரிவித்துள்ளார்.

பரியேறும் பெருமாள், கர்ணன் படங்களுக்கு கிடைத்த வரவேற்புகளைத் தொடர்ந்து மாரி செல்வராஜ் ‘மாமன்னன்’ என்ற திரைப்படத்தை இயக்கியுள்ளார். படத்தில் உதயநிதி ஸ்டாலின் கதாநாயகனாகவும், கீர்த்தி சுரேஷ் கதாநாயகியாகவும் நடித்துள்ளனர்.

முக்கிய கதாபாத்திரத்தில் வடிவேலு ஃபஹத் பாசில் உள்ளிட்டோர் நடித்துள்ளனர். இந்த படத்துக்கு ஏ.ஆர்.ரஹ்மான் இசையமைத்துள்ளார். ரெட் ஜெயன்ட் மூவீஸ் நிறுவனம் படத்தை தயாரித்துள்ளது. தேனி ஈஸ்வர் ஒளிப்பதிவு செய்துள்ளார். உதயநிதி ஸ்டாலினின் கடைசிப்படமாக அறிவிக்கப்பட்ட இத்திரைப்படம் கடந்த மாதம் ஜூன் 29-ம் தேதி திரையரங்குகளில் வெளியானது.

இப்படம் முதல்நாளில் தமிழ்நாட்டில் ரூ.9 கோடிக்கும் அதிகமாக வசூலித்துள்ளதாக தகவல் வெளியாகியுள்ளது. இந்த நிலையில், மாமன்னன் வெற்றியைத் தொடர்ந்து அப்படத்தின் இயக்குநருக்கு மினி கூப்பர் கார் ஒன்றை உதயநிதி பரிசாக வழங்கினார்.

இந்த படத்திற்கு திரைப் பிரபலங்கள் பலரும் பாராட்டுக்கள் தெரிவித்து வரும் நிலையில் நடிகர் ரஜினிகாந்த் இயக்குனர் மாரி செல்வராஜை நேரில் அழைத்து பாராட்டினார்.

இதன் தொடர்ச்சியாக இயக்குநர் விக்னேஷ் சிவனும் படக்குழுவினரை பாராட்டி பதிவொன்றை வெளியிட்டுள்ளார். அதில் வடிவேலு எனும் மகா கலைஞனின் இத்தனை ஆண்டுகால திரை பயணத்துக்கான பரிசாக மாமன்னனுக்காக அவருக்கு தேசிய விருது கொடுப்பதே சிறந்த கெளரவமாக அமையும். முக பாவனையில் மீட்டர் கொஞ்சம் ஏறி இறங்கியிருந்தாலும் அவருடைய காமெடி காட்சிகளை நினைவூட்டிவிடும் அபாயம் இருந்தாலும் தனது அபார நடிப்பால் திரையில் முற்றிலுமாக புது பரிமாணத்தை எட்டியிருக்கும் வடிவேலு இந்த நூற்றாண்டு கண்ட ஆகச் சிறந்த கலைஞர்களில் ஒருவர் என்பதில் துளியும் சந்தேகமில்லை!

உதயநிதி ஸ்டாலின் கேரியரில் இதுவே உச்சம். நிஜ வாழ்வில் ஒரு அரசியல் ஆளுமையாக இருந்த போதிலும் ஒரு இயக்குநர் தனக்கான அரசியலை பேச முழு சுதந்திரம் கொடுத்ததோடு இந்த மாபெரும் படைப்பு உருவாக பக்க பலமாக துணை நின்றதில் அவரது நேர்மை வெளிப்படுகிறது‌.

இவ்வாறு இயக்குனர் விக்னேஷ் சிவன் பதிவிட்டுள்ளார்.

இந்நிலையில் விக்னேஷ் சிவனுக்கு நன்றி தெரிவித்து மாமன்னன் திரைப்படத்தின் இயக்குநர் மாரி செல்வராஜ் ட்விட்டரில் பதில் அளித்துள்ளார்.

https://twitter.com/mari_selvaraj/status/1676619617358467072?t=_RbUayAYfOnJYTuNdKDVjg&s=08