ஐபிஎல் தொடரில் நேற்று நடைபெற்ற 9வது லீக் போட்டியில் பெங்களூரு அணிக்கு எதிரான ஆட்டத்தில் 81 ரன்கள் வித்தியாசத்தில் கொல்கத்தா அணி அபார வெற்றி பெற்றது.
16-வது ஐ.பி.எல். கிரிக்கெட் தொடர் கடந்த 31ம் தேதி தொடங்கி நடைபெற்று வருகிறது. கொல்கத்தா ஈடன் கார்டன் மைதானத்தில் நேற்று இரவு நடைபெற்ற 9-வது லீக் ஆட்டத்தில் கொல்கத்தா நைட் ரைடர்ஸ்-பெங்களூரு ராயல் சேலஞ்சர்ஸ் அணிகள் மோதின.
நேரடியாக கூகுள் செய்திகளிலிருந்து நியூஸ் 7 தமிழ், இணையதளத்தின் செய்திகளை உடனுக்குடன் பெற Google News பக்கத்தை Follow செய்யுங்கள்
டாஸ் வென்ற அணி பெங்களூரு அணி பந்துவீச்சை தேர்வு செய்தது. அதன்படி கொல்கத்தா முதலில் பேட்டிங் செய்தது. தொடக்க வீரர்களாக வெங்கடேஷ் ஐயர் , ரஹ்மத்துல்லா குர்பாஸ் ஆகியோர் களமிறங்கினர். தொடக்கத்தில் டேவிட் வில்லே பந்துவீச்சில் வெங்கடேஷ் ஐயர், மந்தீப் சிங் அடுத்தடுத்து ஆட்டமிழந்தனர். பின்னர் கேப்டன் நிதிஸ் ராணா 1 ரன்களில் வெளியேறினார்.
ரஹ்மத்துல்லா குர்பாஸ் அதிரடியாக விளையாடினார். பந்துகளை பவுண்டரி, சிக்சர் என நாலாபுறமும் பறக்க விட்ட அவர் அரைசதம் அடித்தார். தொடர்ந்து ஆடிய அவர் 57 ரன்களில் கரண் சர்மா பந்துவீச்சில் ஆட்டமிழந்தார். பின்னர் வந்த ரசல் ரன் எதுவும் எடுக்காமல் ஆட்டமிழந்தார். அதற்கு அடுத்து இணைந்த ரிங்கு சிங் மற்றும் ஷர்துல் தாக்கூர் சிறப்பாக விளையாடினர்.
குறிப்பாக ஷர்துல் தாக்கூர் சிறப்பான ஆட்டத்தை வெளிப்படுத்தினார். தொடர்ந்து அதிரடியாக விளையாடிய அவர் 20 பந்துகளில் அரைசதம் அடித்தார். மறுபுறம் அதிரடியாக விளையாடிய ரிங்கு சிங் 46 ரன்களில் வெளியேறினார். இறுதியில் 20 ஓவர்கள் முடிவில் 7 விக்கெட் இழப்பிற்கு 204 ரன்கள் எடுத்தது. ஷர்துல் தாக்கூர் 29 பந்துகளில் 68 ரன்கள் எடுத்து ஆட்டமிழந்தார்.
தொடர்ந்து 204 ரன்கள் இலக்குடன் பெங்களூரு அணி களமிறங்கியது. தொடக்க ஆட்டக்காரர்களாக விராட் கோலி மற்றும் கேப்டன் டூ பிளசிஸ் ஆகியோர் களமிறங்கினர். தொடக்கம் முதலே இந்த ஜோடி அதிரடி காட்டியது.
விராட் கோலி 21 ரன்களில் வெளியேற, தொடர்ந்து டூ பிளசிஸ் 23 ரன்களும், அடுத்து களமிறங்கிய மேக்ஸ்வெல் 5 ரன்னும், ஹர்சல் பட்டேல் ரன் ஏதும் எடுக்காமலும், மிட்செல் பேரேஸ்வெல் 19 ரன்களும், அனுஜ் ராவத் 1 ரன்னும், தினேஷ் கார்த்திக் 9 ரன்னும், கரண் சர்மா 1 ரன்னும், ஆகாஷ் தீப் 17 ரன்களும் எடுத்து கொல்கத்தா அணியின் பந்துவீச்சை சமாளிக்க முடியாமல் திணறியது. இறுதியில் பெங்களூரு அணி 17.4 ஒவர்களில் அனைத்து விக்கெட்டுகளையும் இழந்து 123 ரன்கள் மட்டுமே எடுத்தது.
கொல்கத்தா அணியின் சார்பில் அதிகபட்சமாக வருண் சக்ரவர்த்தி 4 விக்கெட்டுகளும், சுயாஷ் சர்மா 3 விக்கெட்டுகளும், சுனில் நரைன் 2 விக்கெட்டுகளும், ஷர்துல் தாக்கூர் 1 விக்கெட்டும் வீழ்த்தினர். இதன்மூலம் பெங்களூரு அணிக்கு எதிரான ஆட்டத்தில் 81 ரன்கள் வித்தியாசத்தில் கொல்கத்தா அணி அபார வெற்றி பெற்றது.
