நியூசிலாந்துக்கு சுற்றுப்பயணம் மேற்கொண்டுள்ள இந்திய கிரிக்கெட் அணி, 2 போட்டிகள் கொண்ட டெஸ்ட் தொடரில் விளையாடி வருகிறது. அதன்படி, முதல் போட்டி நேற்று வெல்லிங்டன் மைதானத்தில் தொடங்கியது. இதில் டாஸ் வென்ற இந்திய அணி பந்துவீச்சைத் தேர்வு செய்தது.
அதன்படி, முதலில் பேட்டிங் ஆடிய நியூசிலாந்து அணி வீரர்கள், இந்திய அணியின் பந்துவீச்சைச் சமாளிக்க முடியாமல் திணறினர். பும்ரா வீசிய முதல் ஓவரிலேயே நியூசிலாந்து அணியின் கேப்டன் டாம் லேதம் ரன் எதுவும் எடுக்காமல் ஆட்டமிழந்தார்.
இதனையடுத்து, ரச்சின் ரவீந்திரா 15 ரன்களிலும், டேரில் மிட்செல் 1 ரன்னிலும், டாம் பிளண்டெல் 5 ரன்களிலும் ஆட்டமிழந்தனர். மறுமுனையில் ஹென்றி நிக்கோல்ஸ் நிதானமாக ஆடி ரன்களைக் குவித்தார். இதனால், அந்த அணி 70 ரன்களுக்குள் 5 விக்கெட்டுகளை இழந்து தடுமாறியது. இதனைத் தொடர்ந்து களமிறங்கிய கிளென் பிலிப்ஸ், ஹென்றி நிக்கோல்ஸுடன் இணைந்து ரன்கள் சேர்த்தார். இந்த ஜோடி படிப்படியாக அணியின் ஸ்கோரை உயர்த்தியது. இருவரும் இணைந்து 6-வது விக்கெட்டுக்கு 216 ரன்கள் சேர்த்தனர். நியூசிலாந்து அணி 5 விக்கெட் இழப்புக்கு 243 ரன்கள் எடுத்திருந்த நிலையில், முதல் நாள் ஆட்டம் முடிவுக்கு வந்தது. ஹென்றி நிக்கோல்ஸ் 113 ரன்களுடனும், கிளென் பிலிப்ஸ் 94 ரன்களுடனும் களத்தில் இருந்தனர்.
இந்த நிலையில், இரண்டாம் நாள் ஆட்டம் தொடங்கியது. சிறப்பாக ஆடி சதமடித்த கிளென் பிலிப்ஸ், 216 பந்துகளை எதிர்கொண்டு 118 ரன்கள் எடுத்து ஆட்டமிழந்தார். மறுமுனையில் தொடர்ந்து விளையாடிய ஹென்றி நிக்கோல்ஸ், 335 பந்துகளில் 175 ரன்கள் குவித்து இறுதிவரை ஆட்டமிழக்காமல் இருந்தார். மறுமுனையில் நியூசிலாந்து வீரர்கள் சொற்ப ரன்களில் ஆட்டமிழந்தனர். இதனால், நியூசிலாந்து அணி முதல் இன்னிங்ஸில் அனைத்து விக்கெட்டுகளையும் இழந்து 368 ரன்கள் எடுத்தது.
இந்திய அணியின் பந்துவீச்சில் ஜஸ்பிரித் பும்ரா 4 விக்கெட்டுகளை வீழ்த்தி அசத்தினார். ஆகாஷ் தீப் 3 விக்கெட்டுகளையும், அன்ஷுல் கம்போஜ் 2 விக்கெட்டுகளையும் கைப்பற்றினர். பிரசித் கிருஷ்ணா ஒரு விக்கெட் எடுத்தார்.
இதனைத் தொடர்ந்து, இந்திய அணி தனது முதல் இன்னிங்ஸை ஆடி வருகிறது.




