காங்கோவில் ராணுவ விமானம் ஒன்று விபத்துக்குள்ளானதில் 14 பேர் உயிரிழந்துள்ளனர். உயிரிழந்தவர்களில் அந்நாட்டின் ராணுவத்தின் மூத்த அதிகாரிகளும் அடங்குவர். இந்த விபத்து செப்டம்பர் 25, வெள்ளிக்கிழமை அன்று, குவாங்கோவின் தென்மேற்கு மாகாணத்தில் அமைந்துள்ள கெங்கே என்ற இடத்தில் நிகழ்ந்தது. விபத்துக்குள்ளான ராணுவ விமானம் தென்மேற்கில் உள்ள கிக்விட் நகரிலிருந்து புறப்பட்டு, தலைநகரான கின்ஷாசாவை நோக்கிச் சென்று கொண்டிருந்தது. வழியில், தொழில்நுட்பக் கோளாறு ஏற்பட்டதால், விமானி கெங்கேவில் அவசரமாகத் தரையிறங்க முயன்றார். இருப்பினும் அங்கு ஓடுபாதை இல்லாததால், அந்த விமானம் ஒரு குடியிருப்புப் பகுதியில் விழுந்து நொறுங்கியது.
அவசரமாகத் தரையிறங்க முயற்சி மேற்கொள்ளப்பட்ட போதிலும், ஓடுபாதை இல்லாததால் விமானம் குடியிருப்புப் பகுதிக்குள் விழ வேண்டிய கட்டாயம் ஏற்பட்டது என்று குவாங்கோ மாகாண துணை ஆளுநர் ரெமி சாகி பொகிண்டா தெரிவித்தார். காங்கோ இராணுவத்தின் செய்தித் தொடர்பாளரான மேஜர் ஜெனரல் எஃபோமி எகெங்கே, உயிரிழந்தவர்களின் எண்ணிக்கை 14 என்பதை உறுதிப்படுத்தியதோடு, விமானத்தில் இருந்த அனைவரும் உயிரிழந்ததாகவும் தெரிவித்தார்.
பாதிக்கப்பட்ட 12 பேரின் உடல்கள் அடையாளம் காண முடியாத அளவுக்கு எரிந்து போயிருந்ததாகவும், விமானியின் உடல் விமானத்தின் சிதைவுகளுக்கு வெளியே மீட்கப்பட்டதாகவும் தகவல் தெரிவிக்கப்பட்டுள்ளது. இறந்தவர்களில் பொதுமக்களும், இரண்டு தளபதிகளுடன் சென்ற அரசாங்கக் குழுவின் உறுப்பினர்களும், பல இராணுவ வீரர்களும் அடங்குவதாக இராணுவம் தெரிவித்துள்ளது.
விபத்துக்கான காரணத்தைக் கண்டறிய விசாரணை தொடங்கப்பட்டுள்ளதாக மேஜர் ஜெனரல் எகெங்கே அறிவித்தார். கனிவளம் நிறைந்த மத்திய ஆப்பிரிக்க நாடான காங்கோ, நீண்ட காலமாக ஆயுத மோதல்களால் பாதிக்கப்பட்டு வருகிறது. குறிப்பாக ருவாண்டா எல்லையை ஒட்டிய கிழக்குப் பகுதியில், மதிப்புமிக்க சுரங்கப் பகுதிகளின் கட்டுப்பாட்டிற்காக பல்வேறு ஆயுதக் குழுக்கள் நீண்டகால சண்டையில் ஈடுபட்டுள்ளன. கடந்த ஓராண்டாக, கிளர்ச்சிக் குழுக்களின் கட்டுப்பாட்டின் கீழ் வந்த முக்கிய நகரங்களை மீட்கும் நடவடிக்கைகளை அந்நாட்டின் இராணுவம் மேற்கொண்டு வருவது குறிப்பிடத்தக்கது.
