அதிகரித்து வரும் நிலையற்ற வானிலை மற்றும் காலநிலை அபாயங்களுக்கு மத்தியில், இமயமலை நாடான நேபாளத்தைத் தாக்கி வரும் தொடர் பேரழிவுகளில் சமீபத்தியதாக, அந்நாட்டின் மனாங் மாவட்டத்தில் உள்ள ஹிம்லுங் ஹிமால் மலை அடிவார முகாமை பனிச்சரிவு தாக்கியதில், பத்து மலையேறுபவர்கள் மற்றும் துணைப் பணியாளர்கள் காணாமல் போயுள்ளனர்.
நேபாள பயண ஏற்பாட்டாளர்கள் சங்கத்தின்படி, நார் பூ பகுதியில் உள்ள 7,126 மீட்டர் உயர சிகரத்தின் அடிவார முகாமை பனிச்சரிவு தாக்கியதில், கூடாரங்கள் புதைபட்டன. இதில் 10 பேர் காணாமல் போயினர். அதில் எட்டு பேர் ஹிமாலயன் ஹாலிடேஸ் நேபாள நிறுவனத்தையும், இரண்டு பேர் இமேஜின் நேபாள நிறுவனத்தையும் சேர்ந்தவர்கள்.
சுற்றுலாத் துறையின் தலைமை இயக்குநர் ராம் கிருஷ்ண லாமிச்சானே, அதிகாரிகள் நிலைமையைக் கண்காணித்து வருவதாகவும், விவரங்களைச் சேகரிக்கவும், காணாமல் போனவர்களைக் கண்டறியவும் பணியாற்றி வருவதாகவும் கூறினார். அவர்களின் அடையாளங்கள் இன்னும் உறுதி செய்யப்படவில்லை.
சமீப நாட்களாக பெய்து வரும் தொடர் மழை மற்றும் பனிப்பொழிவு, நேபாளத்தின் பல மலை மாவட்டங்களைப் பாதித்துள்ளது. இதனால், பனிச்சரிவு மற்றும் திடீர் வெள்ள அபாயங்கள் குறித்து அதிகாரிகள் எச்சரித்துள்ளனர்.
