இந்தியா – இலங்கை அணிகள் மோதும் இரண்டாவது ஒருநாள் போட்டி, கொழும்புவில் இன்று (ஆக. 4) நடைபெற உள்ளது.
இலங்கை சென்றுள்ள இந்திய அணி, சூர்யகுமார் யாதவ் தலைமையில் முதலில் விளையாடிய டி20 தொடரை 3-0 என கைப்பற்றி ஒயிட்வாஷ் செய்தது. அடுத்து, ரோகித் தலைமையில் 3 போட்டிகள் கொண்ட ஒருநாள் போட்டித் தொடரில் மோதி வருகிறது. கொழும்புவில் நேற்று முன்தினம் (ஆக. 2) நடந்த முதல் போட்டி, எத்தரப்புக்கும் வெற்றி தோல்வியின்றி சரிசமனில் முடிந்தது.
இலங்கை அணி 50 ஓவரில் 8 விக்கெட் இழப்புக்கு 230 ரன் எடுத்த நிலையில், அடுத்து விளையாடிய இந்தியாவுக்கு அரை சதம் விளாசி நல்ல தொடக்கத்தை தந்தார் ரோகித். அடுத்து வந்தவர்கள் பெரிதாகக் கை கொடுக்காவில்லை. கே.எல்.ராகுல் – அக்சர் பொறுப்புடன் விளையாடி வெற்றியை நெருங்கினர். அவர்கள் ஆட்டமிழந்தபோது, இந்தியா 40.5 ஓவரில் 8 விக்கெட் இழப்புக்கு 197 ரன் எடுத்திருந்தது.
அதன் பிறகு 47.3 ஓவரிலேயே 230 ரன் எடுத்து சமநிலையை எட்டினாலும், தேவையில்லாமல் அடுத்தடுத்து 2 விக்கெட்டை பறிகொடுக்க ஆட்டம் ‘டை’ ஆனது. இரு அணிகளும் 0-0 என சமநிலை வகிக்க, 2வது போட்டி இன்று நடைபெற உள்ளது. இரு அணிகளும் முதல் வெற்றி முனைப்புடன் வரிந்துகட்டுவதால், ஆட்டத்தில் அனல் பறப்பது உறுதி என இணையத்தில் கிரிக்கெட் ரசிகர்கள் கருத்து தெரிவித்து வருகின்றனர்.
