அரசுப் பள்ளிகள், கல்லூரிகளில் காலியாக உள்ள 10,371 ஆசிரியர்கள், பேராசிரியர்கள், பாலிடெக்னிக் விரிவுரையாளர் பணியிடங்களுக்கான வருடாந்திர தேர்வு அட்டவணை வெளியிடப்பட்டுள்ளது.
இடைநிலை ஆசிரியர், பட்டதாரி ஆசிரியர் பணியிடங்களுக்கான அறிவிப்பாணை செப்டம்பரில் வெளியிடப்படும்; டிசம்பரில் தேர்வு நடத்தப்படும் என்று ஆசிரியர் தேர்வு வாரியம் தெரிவித்தது.
இதர பணியிடங்களுக்கு அரசாணை வெளியிடப்பட்ட உடன் அறிவிப்பாணை வெளியாகும் என்றும் அறிவிக்கப்பட்டுள்ளது.
தமிழகத்தில் ஆசிரியர் தகுதித் தேர்வு 2020, 2021-ம் ஆண்டுகளில் நடத்தப்படாத நிலையில், கடந்த மார்ச் மாதம் அறிவிப்பு வெளியானது. தற்போது தேர்வுக்கான உத்தேச தேதி குறித்த விவரம் வெளியிடப்பட்டுள்ளது.
ஆசிரியர் தேர்வு வாரியம் வெளியிட்ட அறிவிப்பில் கூறப்பட்டுள்ளதாவது:
2022-ம் ஆண்டுக்கான ஆசிரியர் தகுதித் தேர்வு தொடர்பான அறிவிப்பு ஆசிரியர் தேர்வு வாரியம் வாயிலாக கடந்த மார்ச் 7-ம் தேதி வெளியிடப்பட்டது. அதில் மார்ச் 14-ம் தேதி முதல் விண்ணப்பிக்கலாம் எனவும், ஏப்ரல் 26 வரை விண்ணப்பிக்க அவகாசமும் வழங்கப்பட்டது. தற்போது ஆகஸ்ட் 25 முதல் 31-ம் தேதி வரையுள்ள தேதிகளில் தாள் 1-க்கு மட்டும் முதற்கட்டமாக தேர்வுகள் நடத்த உத்தேசிக்கப்பட்டுள்ளது. தேர்வு கால அட்டவணை, அனுமதிச்சீட்டு வழங்கும் விவரம் ஆகஸ்ட் 2-ம் வாரம் அறிவிக்கப்படும்’’ என்று கூறப்பட்டுள்ளது.
