‘ஜப்பான் மேட் இன் இந்தியா’ என்ற வரிகளுடனும், நடிகர் கார்த்தியின் முற்றிலும் மாறுபட்ட வேடத்துடனும் வெளியான ’ஜப்பான்’ பட டீசர் இணையத்தில் வைரலாகி வருகிறது.
தமிழ் சினிமாவின் முன்னணி நடிகர்களில் ஒருவராக வலம் வருபவர் கார்த்தி. முதல் படமான பருத்திவீரனில் ஆரம்பித்து சமீபத்தில் வெளியான பொன்னியின் செல்வன் வரை தனது படங்களில் வெவ்வேறு விதமான கதாபாத்திரங்களை ஏற்று அவரது ரசிகர்களை குதூகலப்படுத்தி வருகிறார். அந்த வகையில் இவர் நடிப்பில் கடந்தாண்டு மூன்று படங்கள் அடுத்தடுத்து வெளியாகி கலவையான விமர்சனங்களை பெற்றது.
குக்கூ, ஜோக்கர், ஜிப்ஸி உள்ளிட்ட படங்களை இயக்கிய இயக்குனர் ராஜு முருகன் இயக்கும் ‘ஜப்பான்’ படத்தில் நடித்து வருகிறார் கார்த்தி. கார்த்தியுடன் அனு இமானுவேல், இயக்குநர் விஜய் மில்டன் மற்றும் தெலுங்கு நடிகர் சுனில் ஆகியோர் முக்கியக் கதாபாத்திரத்தில் நடிக்கின்றனர்.
கார்த்தியின் 25வது படமான ஜப்பான் தமிழ், மலையாளம், கன்னடம் மற்றும் தெலுங்கு உள்ளிட்ட நான்கு மொழிகளில் வெளியாக உள்ளது. ஜி.வி.பிரகாஷ் இசையமைக்கும் இப்படத்தினை ட்ரீம் வாரியர்ஸ் பிக்சர்ஸ் நிறுவனம் தயாரித்து வருகிறது. இதன் படப்பிடிப்பு தற்போது விறுவிறுப்பாக நடந்து வருகிறது.
நடிகர் கார்த்தி நேற்று தனது 46-வது பிறந்தநாளை கொண்டாடிய நிலையில், ரசிகர்களுக்கு விருந்தளிக்கும் விதமாக, ’ஜப்பான்’ படம் தீபாவளி அன்று வெளியாகும் என்ற அறிவிப்பையும், அறிமுக டீசரையும் படக்குழு வெளியிட்டது. தற்போது இந்த டீசர் இணையதளங்களில் வைரலாகி வருகிறது.
