இரண்டாவது நாளாக இயக்குநர் பாரதிராஜாவுக்கு எம்ஜிஎம் மருத்துவமனையில் மேல் சிகிச்சை அளிக்கப்பட்டு வருகிறது.
தமிழ் திரையுலகில் புகழ்பெற்ற இயக்குநரான பாரதிராஜா தற்போது பல்வேறு குணச்சித்திர வேடங்களில் நடித்து அசத்தி வருகிறார். ராதிகா உள்ளிட்ட பல ஹீரோயின்களை தமிழ் சினிமாவில் அறிமுகப்படுத்தியவர். அண்மையில் வெளியாகிய திருச்சிற்றம்பலம் படத்தில் தனுஷின் தாத்தாவாக பாரதிராஜா நடித்திருந்தார். இவரது நடிப்பு ரசிகர்களிடையே மிகுந்த வரவேற்பைப் பெற்றுள்ளது.
இந்நிலையில், இயக்குநர் பாரதிராஜா திடீர் உடல்நலக் குறைவு காரணமாக கடந்த 23ஆம் தேதி தி நகரில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வந்தார். தொடர்ந்து சிகிச்சைகள் அளிக்கப்பட்டு வந்த நிலையில் நேற்று மதியம் அமைந்தகரையில் உள்ள எம் ஜி எம் மருத்துவமனைக்கு மேல் சிகிச்சைக்காக இயக்குனர் பாரதிராஜா மாற்றப்பட்டார். எம் ஜி எம் மருத்துவமனையின் மருத்துவ குழு நிபுணர்கள் அவரது உடல்நிலை குறித்து பரிசோதனை செய்தனர்.
நுரையீரல் தொற்று ஏற்பட்டு இருக்கிறதா நுரையீரலில் உள்ள பாதிப்பு குறித்து மருத்துவக் குழு பரிசோதனை மேற்கொண்டனர். இரண்டாவது நாளாக அவருக்கு எம்ஜிஎம் மருத்துவமனையில் சிகிச்சை அளிக்கப்பட்டு வருகிறது. அவரது உடல்நிலை சீராக உள்ளதாக தகவல் வெளியாகி உள்ளது.
-ம.பவித்ரா
