தோல் பொருட்கள் தயாரிப்பு மற்றும் ஏற்றுமதி நிறுவனமான கே.எச்.குரூப் தலைமை அலுவலகத்தில் 2வது நாளாக வருமானவரித் துறை சோதனை நடைபெற்று வருகிறது.
தோல் பொருட்கள் தயாரிப்பு மற்றும் தோல் பொருட்கள் ஏற்றுமதி நிறுவனமான கே.எச்.குரூப் தலைமை அலுவலகம் சென்னையில் உள்ளது. இதன் கிளை நிறுவனங்கள் வேலூர், பாண்டிசேரி உள்ளிட்ட பல்வேறு பகுதிகளில் உள்ளது. 1947 ஆம் ஆண்டு கிசார் ஹுசைன் என்பவரால் கே.எச் குரூப் தொழிற்சாலை ராணிப்பேட்டையில் நிறுவப்பட்டது. அதே போன்று 1985 ம் ஆண்டு Rabia Leather Industries Private Limited என்ற கிளை நிறுவனம் தொடங்கப்பட்டு பின்பு 2013 ஆம் ஆண்டு K.H Exports India Private Limited பெயர் மாற்றம் செய்யப்பட்டது.
இந்த கே.எச் குரூப் தோல்பொருட்கள் தயாரிப்பு நிறுவனங்கள் ஆண்டுக்கு 20 மில்லியன் சதுர அடி தோல் பதனிடுதல், 3 மில்லியன் ஜோடி காலணிகள், 9 லட்சம் தோல் பைகள், 3 மில்லியன் சிறிய தோல் பொருட்கள், 2 மில்லியன் கையுறை ஆகியவற்றை தயாரித்து வெளிநாடுகளுக்கு ஏற்றுமதி செய்து வருகிறது.
இந்நிலையில், தலைமை அலுவலகம் மற்றும் அதன் தொடர்புடைய சென்னை, வேலூர், பாண்டிச்சேரி உள்ளிட்ட 60 இடங்களில் நேற்று வருமானவரித் துறையினர் சோதனை நடத்தினர். வரி ஏய்ப்பு புகார் தொடர்பாக இந்த சோதனை நடத்தப்படுவதாக அதிகாரிகள் தெரிவித்தனர். அதனை தொடர்ந்து இன்று இரண்டாவது நாளாகவும் சோதனை நடைபெற்று வருகிறது.
கடந்த 2016 ஆம் ஆண்டு கணக்கெடுப்பின்படி இந்த நிறுவனங்கள் ஆண்டு ஒன்றுக்கு சுமார் ஆயிரம் கோடிக்கும் மேல் வருமானம் ஈட்டி உள்ளது. இந்த நிலையில் கடந்த சில ஆண்டுகளாக வருமானத்தை மறைத்து நிறைய இடங்களில் சொத்துக்கள் மற்றும் நிறுவனங்கள் வாங்கி இருப்பதும் பல தனியார் நிறுவனங்களை தன்னுடன் இணைத்து தோல் பொருட்கள் தயாரித்து வந்ததும் தெரியவந்துள்ளது. மேலும் வெளிநாடுகளுக்கு ஏற்றுமதி செய்யப்பட்ட பொருட்களின் வருமானத்தை குறைத்துக் காட்டியதாகவும் புகார் எழுந்துள்ளது குறிப்பிடத்தக்கது.
– இரா.நம்பிராஜன்
