ஆடை பிரச்னை குறித்து நடிகர் சதீஷ் வெளியிட்ட விளக்கத்திற்கு மறுப்பு தெரிவித்து நடிகை தர்ஷா குப்தா டிவிட்டரில் பதிவிட்டுள்ளார்.
சன்னி லியோன், சதீஷ், தர்ஷா குப்தா, ஜி.பி.முத்து உள்ளிட்டோர் நடித்துள்ள படம் ’ஓ மை கோஸ்ட்’. சென்னையில் இப்படத்தின் இசை மற்றும் ட்ரெய்லர் வெளியீட்டு விழா கடந்த சில நாட்களுக்கு முன்பு நடைபெற்றது. இவ்விழாவில் சன்னி லியோன், சதீஷ் உட்பட படக்குழுவினர் பலர் கலந்து கொண்டனர்.
விழாவில் பேசிய நடிகர் சதீஷ், பாம்பேயிலிருந்து வந்திருந்த சன்னி லியோன் நமது கலாச்சாரப்படி சேலை அணிந்து வந்துள்ளார். ஆனால் கோயம்புத்தூர் பெண்ணான தர்ஷா குப்தா எப்படி உடை அணிந்து வந்துள்ளார் என்று கிண்டல் செய்து பேசினார்.
நடிகர் சதீஷ் ஆடை குறித்து விமர்சித்தது பெரும் சர்ச்சைக்கு உள்ளான நிலையில், நடிகர் சதீஷ் அந்த நிகழ்விற்கு விளக்கம் தெரிவித்தும் தான் பேசியது தர்ஷா குப்தா அவர்களின் அனுமதியுடன் தான் நகைச்சுவைக்காக பேசினேன் என வீடியோ ஒன்றை வெளியிட்டு இருந்தார்.
இந்நிலையில் நடிகர் சதீஷ் வெளியிட்ட அந்த வீடியோவிற்கு மறுப்பு தெரிவிக்கும் வகையில் நடிகை தர்ஷா குப்தா பதில் ஒன்றை டிவிட்டரில் பதிவிட்டுள்ளார்.
அதில் அவர் குறிப்பிட்டுள்ளதாவது, நடிகர் சதீஷ் இந்த விஷயத்தை என் பக்கம் திருப்பி விடுகின்றார், இது மிகவும் விசித்திரமான ஒன்று. யாராவது அவர்களைப் பற்றி அவர்களே மேடையிலே அசிங்கமாக பேச சொல்வார்களா?, எனக்கும் நீங்கள் அன்று பேசியது மிகவும் வருத்தமாக தான் இருந்தது. ஆனால் நான் அதை பெரிதாக காட்டிக் கொள்ளவில்லை. ஆனால் இப்போது இப்படி மாற்றி சொல்வது சரியல்ல என்று அவர் பதிவிட்டுள்ளார்.
