கரப்பான்பூச்சி ஜனதா கட்சியின் நிறுவனர் அபிஜித் தீப்கே வெளியிட்டுள்ள எக்ஸ் தளப் பதிவில் கூறியிருப்பதாவது, “இந்தப் பதிவு எதிர்க்கட்சியினருக்காக, தேர்தல்கள் முறைகேடாக நடத்தப்படுகின்றன என்று நீங்கள் கூறுகிறீர்கள். ஆனால், முறைகேடான தேர்தல்கள் என்று நீங்கள் கூறிக்கொண்டே தொடர்ந்து அவற்றில் பங்கேற்பதன் மூலம், அந்தத் தேர்தல்களுக்கு நீங்கள் சட்டப்பூர்வ அங்கீகாரம் வழங்குகிறீர்கள்; அவை சுதந்திரமானதும் நியாயமானதுமான தேர்தல்கள் என்ற மாயத்தோற்றத்தையும் நீங்களே நிலைநிறுத்துகிறீர்கள்.
நீங்கள் தொடர்ந்து தேர்தல்களில் போட்டியிடுவதற்குக் காரணம், அவ்வாறு செய்யாவிட்டால் உங்கள் கட்சி அரசியல் ரீதியாக இல்லாமல் போய்விடும் என்ற அச்சமா? ஆனால் வாக்குகள் திருடப்படுவதாகவும், உங்கள் எம்.எல்.ஏ.க்களும் எம்.பி.க்களும் கட்சி மாறச் செய்யப்படுவதாகவும், உங்கள் கட்சிகள் பிளவுபடுத்தப்படுவதாகவும் கூறப்படும் நிலையில், நீங்கள் பாதுகாக்க முயற்சிக்கும் அந்த அரசியல் இருப்பின் அர்த்தம் என்ன?
இது அரசியல் ரீதியான உயிர்வாழ்வு அல்ல. எப்போது வேண்டுமானாலும் உங்களை பலவீனப்படுத்தவும், உங்கள் கட்சியைப் பிளக்கவும் அல்லது நீங்கள் தேர்ந்தெடுக்கப்பட்ட பிரதிநிதிகளை உங்களிடமிருந்து பிரித்தெடுக்கவும் முடியும் என்ற ஒரு அமைப்புக்குள், நீங்கள் வெறுமனே உயிருடன் இருக்க முயற்சிப்பது போன்றதே. இவ்வாறு நீங்கள் இன்னும் எவ்வளவு காலம் தாக்குப்பிடிக்க முடியும்?
மேலும், உங்களுக்கு முக்கியத்துவம் வாய்ந்த மாநிலங்களில் மட்டுமே தேர்தல் முறைகேடு நடந்ததாகக் கூறிவிட்டு, வேறு இடங்களில் அது நடந்தால் மௌனம் காக்க முடியாது. தேர்தல்கள் முறைகேடாக நடத்தப்படுகின்றன என்றால், அது எந்த மாநிலமாக இருந்தாலும், எந்தக் கட்சி பாதிக்கப்பட்டாலும், அது முக்கியமானதாக இருக்க வேண்டும்.
விளையாட்டின் விதிகளே முறைகேடானவை என்று கூறிக்கொண்டே, தொடர்ந்து அதே விளையாட்டில் பங்கேற்க முடியாது. நீங்கள் பங்கேற்பதே, நீங்கள் முறைகேடானவை என்று கூறும் அந்தத் தேர்தல்களுக்கு நியாயத்தன்மை இருப்பதாகக் காட்டும் ஒரே காரணியாகிறது.
உங்கள் சொந்த அரசியல் உயிர்வாழ்வைப் பற்றி சிந்திப்பதற்கு முன், நாட்டையும் அதன் ஜனநாயகத்தையும் பற்றி சிந்தியுங்கள். ஒரு நிலைப்பாட்டை எடுத்து, முறைகேடானவை என்று நீங்கள் கருதும் தேர்தல்களில் பங்கேற்பதை நிறுத்துங்கள்.” இவ்வாறு அதில் தெரிவிக்கப்பட்டுள்ளது.
