கொரோனாவால் பின்னணி பாடகி லதா மங்கேஷ்கரின் உடல்நிலை கவலைக்கிடமாக இருந்த நிலையில் சிகிச்சை பலனின்றி இன்று காலமானார்.
பிரபல பின்னணி பாடகி லதா மங்கேஷ்கர் கொரோனா தொற்றால் பாதிக்கப்பட்டு லேசான அறிகுறிகளுடன், தெற்கு மும்பையின் ப்ரீச் கேண்டி மருத்துவமனையில் கடந்த மாதம் ஜன.8-ஆம் தேதி அனுமதிக்கப்பட்டார். லேசான அறிகுறிகளுடன் சிகிச்சை பெற்று வந்த அவருக்கு நிமோனியா பாதிப்பும் ஏற்பட்டிருந்தது.
அப்போது அவரது உடல்நிலை சற்று கவலைக்கிடமாக இருந்ததால் உடனடியாக ஐசியூ வார்டில் வைத்து சிகிச்சை அளித்து வந்தனர். தொடர்ந்து அவருக்கு வெண்டிலேட்டர் வசதி பொருத்தப்பட்டதாக மருத்துவர்கள் தெரிவித்திருந்தனர். இதனால், உலகம் முழுவதுமுள்ள லதா மங்கேஷ்கரின் ரசிகர்கள், அவர் உடல்நலம் சீராக பிரார்த்தனை மேற்கொள்ளத் தொடங்கினர்.
தொடர்ந்து 20 நாள்கள் சிகிச்சைக்குப் பிறகு அவரின் உடல்நலம் தேறியது. இதனால் கடந்த மாதம் 28ஆம் தேதி வெண்டிலேட்டர் சிகிச்சை நிறுத்தப்பட்டது. ஆனால், வயது மூப்பு காரணமாக டிஸ்சார்ஜ் செய்யாமல், அவரின் உடல் நிலையை மருத்துவர்கள் தொடர்ந்து கண்காணித்து வந்தனர். இந்த நிலையில், லதா மங்கேஷ்கரின் உடல்நிலை மோசமடைந்து கவலைக்கிடமாக இருப்பதாகவும் அவருக்கு தொடர்ந்து சிகிச்சை அளிக்கப்பட்டு வருவதாகவும் மருத்துவமனை நிர்வாகம் நேற்று தகவல் தெரிவித்திருந்தது. இந்நிலையில், கடந்த 29 நாட்களாக மருத்துவமனையில் சிகிச்சை பெற்று வந்த நிலையில் இன்று காலை 8.12 மணியளவில் சிகிச்சை பலனின்றி காலமானார்.
