சென்னை ஓபன் காலிறுதியில் இந்திய வீராங்கனை மாயா தோல்வி!

காலிறுதியில் மாயாவுக்கு அதிர்ச்சி தோல்வி!

சென்னை ஓபன் டென்னிஸ் தொடரின் காலிறுதிப் போட்டி நேற்று ( நவம்பர் 6) வெள்ளிக்கிழமை நடைபெற்றது. இதில் இந்தியாவின் 17 வயதான மாயா ராஜேஸ்வரன் ரேவதி, அமெரிக்காவின் 22 வயதான ராபின் மாண்ட்கோமரியை எதிர்கொண்டார். இப்போட்டியில் தொடக்கத்தில் சற்று தடுமாறிய மாண்ட்கோமரி, பின்னர் தனது ஆட்டத்தின் வேகத்தை அதிகரித்து மாயாவுக்கு நெருக்கடி கொடுத்தார். மாயாவின் சர்வீஸில் ஏற்பட்ட தடுமாற்றங்களையும், அவர் செய்த இரட்டைத் தவறுகளையும் தனக்குச் சாதகமாகப் பயன்படுத்திக்கொண்ட மாண்ட்கோமரி, 6-3, 6-3 என்ற நேர் செட் கணக்கில் வெற்றி பெற்று அரையிறுதிக்கு முன்னேறினார்.

சானியா மிர்சாவுக்குப் பிறகு சாதனை!

இந்தத் தொடரில் தோல்வியடைந்தாலும், மாயா குறிப்பிடத்தக்க சாதனையைப் படைத்துள்ளார். உலகத் தரவரிசையில் 669-வது இடத்தில் உள்ள மாயா, காலிறுதிக்கு முன்னேறும் வழியில் தன்னை விட உயர்ந்த தரவரிசையில் இருந்த இரண்டு வீராங்கனைகளை வீழ்த்தினார். முதலில் 115-வது இடத்தில் இருந்த போலந்தின் காதர்சினா காவாவையும், பின்னர் 277-வது இடத்தில் இருந்த வெரோனிகா ஃபால்கோவ்ஸ்காவையும் வீழ்த்தி காலிறுதிக்குள் நுழைந்தார். இதன் மூலம், புகழ்பெற்ற இந்திய டென்னிஸ் வீராங்கனை சானியா மிர்சாவுக்குப் பிறகு WTA 250 ஒற்றையர் பிரிவில் காலிறுதிக்கு முன்னேறிய முதல் இந்திய வீராங்கனை என்ற பெருமையை மாயா பெற்றுள்ளார். இதற்கு முன்பு, 2005-ம் ஆண்டு கொல்கத்தாவில் நடைபெற்ற WTA 250 தொடரில் ஷிகா உபெராய் காலிறுதி வரை முன்னேறியிருந்தார். 1990-ம் ஆண்டு இந்தத் தொடர் வடிவம் அறிமுகப்படுத்தப்பட்டதிலிருந்து இந்திய வீராங்கனைகளின் இந்தச் சாதனை குறிப்பிடத்தக்க ஒன்றாகப் பார்க்கப்படுகிறது.

தரவரிசையில் மிகப்பெரிய முன்னேற்றம்!

சென்னை ஓபன் தொடரில் காலிறுதி வரை முன்னேறியதன் மூலம் மாயாவின் உலகத் தரவரிசையிலும் மிகப்பெரிய மாற்றம் ஏற்பட உள்ளது. தற்போது 669-வது இடத்தில் இருக்கும் அவர், திங்கட்கிழமை வெளியாக உள்ள புதிய தரவரிசைப் பட்டியலில் சுமார் 180 இடங்கள் முன்னேறி, தனது சிறந்த தரவரிசையை எட்டுவார் என எதிர்பார்க்கப்படுகிறது.

மாயாவைப் பாராட்டிய அமெரிக்க வீராங்கனை!

காலிறுதிப் போட்டியில் தோல்வியடைந்தாலும், மாயாவின் ஆட்டத்தை அமெரிக்க வீராங்கனை மாண்ட்கோமரி வெகுவாகப் பாராட்டினார். போட்டிக்குப் பிறகு மைதானத்தில் பேசிய அவர், “மாயாவுக்கு மிகவும் சிறப்பான எதிர்காலம் உள்ளது என்று நான் நினைக்கிறேன்” எனத் தெரிவித்தார். மாண்ட்கோமரி கடந்த ஆண்டு உலகின் முதல் 100 வீராங்கனைகள் பட்டியலில் இடம்பிடித்தவர். தற்போது 151-வது இடத்தில் உள்ளார். பிரெஞ்சு ஓபன் மற்றும் விம்பிள்டன் தொடர்களில் இரண்டாவது சுற்று வரை முன்னேறிய அனுபவமும் அவருக்கு உள்ளது. 2019-ம் ஆண்டு ஆரஞ்சு பவுல் பட்டத்தையும் வென்றுள்ளார்.

முதல் சர்வதேச பட்டம் வென்ற மாயா!

சமீபகாலமாக சிறப்பான ஆட்டத்தை வெளிப்படுத்தி வரும் மாயா, ரஃபா நடால் டென்னிஸ் அகாடமியிலிருந்து பிரான்ஸின் கேன்ஸ் நகரில் உள்ள எலைட் டென்னிஸ் மையத்துக்கு மாறி பயிற்சி பெற்று வருகிறார். கடந்த மாதம் நைஜீரியாவின் லாகோஸில் நடைபெற்ற ITF W35 தொடரில் தனது முதல் தொழில்முறை டென்னிஸ் பட்டத்தை வென்றார். தற்போது சென்னை ஓபனில் காலிறுதி வரை முன்னேறி சாதனை படைத்துள்ள மாயா, இந்தத் தொடரின் மூலம் கிடைத்த அனுபவத்தையும் நம்பிக்கையையும் பயன்படுத்தி, நடப்பு சீசனை சிறப்பாக நிறைவு செய்வதுடன் உலகத் தரவரிசையிலும் மேலும் முன்னேறுவார் என எதிர்பார்க்கப்படுகிறது.