சர்வதேச பொருளாதார நிலவரத்துக்கு ஏற்ப இந்தியாவில் தங்கத்தின் விலை அவ்வப்போது உயர்ந்தும், குறைந்தும் வருகிறது. கடந்த சில மாதங்களாக தங்கம் புதிய உச்சம் தொட்டு வருகிறது. அந்த வகையில், தங்கம் விலை கடந்த 17-ம் தேதி வரலாறு காணாத வகையில் உயர்ந்து ஒரு கிராம் ரூ.12ஆயிரத்து 200-க்கும், சவரன் ரூ. 97ஆயிரத்து 600-க்கும் விற்பனை ஆனது. தொடர்ந்து தங்கம் விலை ஏற்ற இறக்கத்தை சந்தித்து வந்தது.
அதன்படி, தங்கம் விலை நேற்று காலை தங்கம் கிராமுக்கு 135 ரூபாய் உயர்ந்து ஒரு கிராம் ரூ.11 ஆயிரத்து 210-க்கும், சவரனுக்கு 1,080 ரூபாய் உயர்ந்து ஒரு சவரன் ரூ.89ஆயிரத்து 680-க்கும் விற்பனையானது. தொடர்ந்து, நேற்று மாலை கிராமுக்கு ரூ.115-ம், சவரனுக்கு ரூ.920-ம் உயர்ந்து ஒரு கிராம் தங்கம் ரூ.11,325-க்கும், சவரன் ரூ.90,600-க்கு விற்பனை செய்யப்பட்டது. வெள்ளி விலை மாற்றமின்றி அதே விலையில் நீடித்தது.
இதனை தொடர்ந்து இன்று (அக்.30) காலை தங்கம் விலை அதிரடியாக குறைந்துள்ளது. அந்த வகையில், கிராமுக்கு ரூ.225 குறைந்து ரூ.11ஆயிரத்து 100க்கும், சவரனுக்கு ரூ.1,800 குறைந்து ரூ.88ஆயிரத்து 800க்கும் விற்பனையாகிறது. வெள்ளி விலை கிராமுக்கு ரூ.1 குறைந்து ரூ.165க்கு விற்பனை செய்யப்படுகிறது.
இந்த நிலையில் தங்கம் விலை மீண்டும் அதிகரிக்க தொடங்கியுள்ளது. அதன்படி சென்னையில் ஆபரண தங்கத்தின் விலை கிராமுக்கு ரூ.200 அதிகரித்து ஒரு கிராம் ரூ.11 ஆயிரத்து 300-க்கும், சவரனுக்கு ரூ.1,600 அதிகரித்து ஒரு சவரன் ரூ.90ஆயிரத்து 400-க்கு விற்பனை செய்யப்படுகிறது.
