இயக்குனர் ஜி.எம்.குமார் திடீர் உடல்நலக் குறைவு காரணமாக மருத்துவமனையில் அனுமதிக்கப்பட்டுள்ளார்.
இவருடைய முழு பெயர் கோவிந்தராஜ் மனோகர் குமார். சென்னையைச் சேர்ந்தவர். இவர் சினிமா உலகில் திரைப்பட நடிகர் மட்டுமில்லாமல் இயக்குநர், தயாரிப்பாளர், எழுத்தாளர் என பன்முகங்கள் கொண்டவர். 1986ஆம் ஆண்டு சிவாஜி புரொடக்ஷன் தயாரிப்பில் பிரபு – பல்லவி நடிப்பில் 1986இல் வெளியான அறுவடை நாள் திரைப்படத்தின் மூலம் இயக்குநராக அறிமுகமானவர் ஜி.எம்.குமார். பின்னர், பிக்பாக்கெட், இரும்புப் பூக்கள், உருவம் என மூன்று படங்களை இயக்கியுள்ளார். அதைத்தொடர்ந்து திரைப்படங்களில் நடிக்கத் தொடங்கினார்.
வசந்தபாலன் இயக்கத்தில் வெளிவந்த வெயில் படத்தில் மாயாண்டித் தேவர் எனும் கோபக்கார அப்பாவாக நடித்து தமிழ் ரசிகர்களின் மனதில் சிறந்த நடிகராகவும் இடம்பிடித்தார். பாலாவின் இயக்கத்தில் வெளிவந்த அவன் இவன் திரைப்படம் ஜி.எம்.குமாரின் நடிப்புத் திறமையை அனைவரிடமும் கொண்டு சேர்த்தது. அவன், இவன் படத்தில் நடித்ததன் மூலம் இவர் மக்கள் மத்தியில் மிகப் பிரபலமானார். இந்தநிலையில், நடிகர் ஜி.எம்.குமார் திடீர் உடல நலக் குறைவால் சென்னையில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வருகிறார். அவர் விரைந்து குணமடைய வேண்டும் என திரைப்பிரபலங்கள் மற்றும் ரசிகர்கள் அவருக்கு வாழ்த்து தெரிவித்து வருகின்றனர்.
-ம.பவித்ரா
