பொன்னியின் செல்வன் 2 படத்தின் முதல் பாடலான அக நக அக நக முகநகையே பாடலின் லிரிக்கல் வீடியோவை படக்குழு வெளியிட்டுள்ளது.
இயக்குநர் மணிரத்னத்தின் இயக்கத்தில் மிக பிரமாண்டமாக உருவாகிய பொன்னியின் செல்வன் முதல் பாகம், கடந்த செப்டம்பர் 30ஆம் தேதி உலகெங்கிலும் வெளியாகி பெரும் வரவேற்பைப் பெற்றது. லைகா புரொடக்சன்ஸ் – மெட்ராஸ் டாக்கீஸ் தயாரித்த இத்திரைப்படத்தில் ஜெயம் ரவி, விக்ரம், கார்த்தி, த்ரிஷா, ஐஷ்வர்யா ராய், சரத்குமார், பார்த்திபன், பிரகாஷ் ராஜ், விக்ரம் பிரபு, ஷோபிதா, ஐஷ்வர்யா லக்ஷ்மி உள்ளிட்ட மிகப் பெரிய நடிகர் பட்டாளமே நடித்திருந்தது.
இசைப்புயல் ஏ.ஆர்.ரகுமான் இசையமைத்த இத்திரைப்படம், புகழ்பெற்ற எழுத்தாளர் கல்கியின் நாவலை அடிப்படையாகக் கொண்டு உருவாகப்பட்டது. பொன்னியின் செல்வன் முதல் பாகம், ரூ.500 கோடிக்கும் மேல் வசூலித்து சாதனை படைத்தது. கலவையான விமர்சனங்களைப் பெற்றிருந்தாலும், வெற்றிப் படமாகவே பொன்னியின் செல்வன் கருதப்பட்டது.
பொன்னியின் செல்வன் இரண்டாம் பாகம் வரும் ஏப்ரல் 28ம் தேதி வெளியாகும் என்று படக்குழு ஏற்கெனவே அறிவித்திருந்த நிலையில் பொன்னியின் செல்வன் இரண்டாம் பாகத்தின் முதல் பாடலான ‘அக நக அக நக முகநகையே..! ’ பாடலை இன்று பொன்னியின் செல்வன் படக்குழு வெளியிட்டுள்ளது.
இதனையும் படியுங்கள்: ’நடிகர் விஜய் பற்றி ஒரே வார்த்தை’ – ரசிகரின் கேள்விக்கு பதிலளித்த ராஷ்மிகா மந்தனா
அக நக அக நக முகநகையே பாடலை பாடலாசிரியர் இளங்கோ கிருஷ்ணன் எழுதியுள்ளார். இப்பாடலை பாடகர் சக்திஸ்ரீ கோபாலன் பாடியுள்ளார். இப்பாடல் வெளியான சில நிமிடங்களிலேயே 3லட்சம் பார்வையாளர்களை தாண்டியுள்ளது.
– யாழன்
