குலசேகரன்பட்டினத்தில் இஸ்ரோ ஏவுதல் மையத்திற்கான நிலம் கையகப்படுத்தும் பணிகளுக்கு இதுவரை 2000 ஏக்கரில் இடம் தேர்வு செய்யப்பட்டுள்ளதாக இஸ்ரோ தலைவர் சோமநாத் தெரிவித்துள்ளார்.
ஆந்திர மாநிலம் ஸ்ரீஹரி கோட்டாவில் உள்ள சதீஷ் தவான் விண்வெளி ஆய்வு மையத்தில் உள்ள 2-வது ஏவுதளத்திலிருந்து பி.எஸ்.எல்.வி. சி-53 ராக்கெட் விண்ணில் ஏவப்பட்டது அதனைத்தொடர்ந்து, செய்தியாளர்களைச் சந்தித்துப் பேசிய இஸ்ரோ தலைவர் சோமநாத், பி.எஸ்.எல்.வி சி-53 ராக்கெட் வெற்றியைத் தொடர்ந்து அடுத்த கட்டமாகச் சிறிய ரக செயற்கைக்கோள்களை விண்ணில் ஏவுவதற்காகப் புதிதாக வடிவமைக்கப்பட்ட எஸ்.எஸ்.எல்.வி ரக ராக்கெட்டை அடுத்த மாதம் விண்ணில் ஏவத் திட்டமிட்டுள்ளதாகத் தெரிவித்தார். தொடர்ந்து பேசிய அவர், விண்வெளிக்கு மனிதனை அனுப்பும் ககன்யான் திட்டம் 5 கட்ட சோதனைக்கு பிறகே விண்ணிற்கு மனிதர்களை அனுப்பப்படும் எனக் கூறினார்.
மேலும், சூரியனை ஆய்வு செய்யும் ஆதித்யா எல் 1 என்ற திட்டம் முழு இறுதி வடிவம் பெற்றுள்ளதாகவும், சந்திரயான் 3 திட்டத்தை வெற்றிகரமாக விண்ணில் ஏவுவதற்குத் தயாராகி வருவதாகவும் குறிப்பிட்ட அவர், இதற்காக சந்திரயான் 2 திட்டத்தின் தோல்வியில் ஏற்பட்ட காரணம் குறித்து தீவிரமாக ஆய்வுகள் செய்து வருவதாகக் கூறினார். ஜிஎஸ்எல்வி ரக ராக்கெட்டுகள் வணிக பயன்பாட்டிற்கு உட்படுத்துவதற்கு முன்பாக, நம்நாட்டுத் தேவையைப் பூர்த்தி செய்யும் பணிகள் தற்போது தீவிரமாக நடைபெற்று வருவதாகத் தெரிவித்த அவர், ஜிஎஸ்எல்வி மார்க் 3 வரும் செப்டம்பரிலும், அடுத்த ஆண்டு ஜனவரியிலும் ஏவ முடிவு செய்துள்ளதாகக் கூறினார்.
அண்மைச் செய்தி: ‘‘பாஜகவின் அரசியல் இந்துக்களுக்கு எதிரானது’ – எம்.பி. தொல்.திருமாவளவன்’
தொடர்ந்து பேசிய அவர், குலசேகரன்பட்டினத்தில் இஸ்ரோ ஏவுதல் மையத்திற்கான நிலம் கையகப்படுத்தும் பணிகள் நடைபெற்று வருவதாகவும், இதுவரை 2 ஆயிரம் ஏக்கர் நிலம் தேர்வு செய்யப்பட்டுள்ளதாகக் குறிப்பிட்டார். ஒருமுறை பயன்படுத்தப்பட்ட ராக்கெட்டை மீண்டும் பயன்படுத்துவது குறித்து 4 முறை சோதனை செய்துள்ளோம் எனத் தெரிவித்த அவர், தற்போது மழைக் காலம் என்பதால் சோதனையை ஒத்திவைத்துள்ளதாகவும், சோதனை தொடர்ந்து நடைபெறும் எனவும், தனியார் செயற்கைக் கோள்களை விண்ணில் ஏவுவதற்கு இஸ்ரோ தயார்நிலையில் உள்ளதாகக் கூறினார்.
