ஜவான் திரைப்படம் வெளியாகி 7 நாட்களுக்கு மேல் ஆன நிலையில் 660 கோடிக்கு மேல் வசூல் செய்து சாதனை படைத்துள்ளதாக படக்குழு அறிவித்துள்ளது.
அட்லி, ஷாருக்கானின் ஜவான் படத்தின் மூலம் பாலிவுட்டில் இயக்குநராக அறிமுகமாகியுள்ளார். இந்தப் படத்தில் ஷாருக்கான் இரண்டு வேடங்களில் நடித்துள்ளார். ஹீரோயினாக நயன்தாரா நடித்துள்ளார். விஜய் சேதுபதி, யோகி பாபு உள்ளிட்டோரும் நடித்திருக்கும் இப்படத்திற்கு அனிருத் இசையமைத்துள்ளார். தமிழ், தெலுங்கு, மலையாளம், கன்னடம், ஹிந்தி ஆகிய மொழிகளில் கடந்த செப்டம்பர் 7ம் தேதி வெளியானது.
இதுவரை இல்லாத அளவில் படத்துக்கு மிகப் பெரிய ஓபனிங் கிடைத்திருப்பதாகவும், படமும் சிறப்பாக இருப்பதாகவும் பாலிவுட் ஊடகங்கள் தெரிவித்து வருகின்றன. முதல் நாளில் இந்தி சினிமா வரலாற்றில் இதுவரை இல்லாத அளவில் உலகம் முழுவதும் ரூ.129 கோடி வசூலித்துள்ளதாகவும், இரண்டு நாட்களில் ரூ.240.47 கோடி ரூபாய் வசூல் செய்ததாக படக்குழு அதிகாரப்பூர்வமாக அறிவித்திருந்தது.
நேற்று 5வது நாள் வசூல் விவரத்தினை படக்குழு வெளியிட்டுள்ளது. உலகம் முழுவதும் 5நாள்களில் ரூ. 574.89 கோடி வசூலித்துள்ளதாக அதிகாரபூர்வ அறிவிப்பு வெளியானது. மேலும், ஷாருக்கான் ஒரு வருடத்தில் தொடர்ந்து இரண்டு ₹500 கோடி வசூல் செய்த ஒரே நடிகர் என்ற பெருமையையும் தட்டிச் சென்றுள்ளார். ஏனெனில் ஷாருக்கான் கடைசியாக நடித்த பதான் திரைப்படமும் வசூலில் சாதனை புரிந்திருந்தது.
https://twitter.com/RedChilliesEnt/status/1701914299692982768
ரூ.300 கோடி பட்ஜெட்டில் உருவானதாக கூறப்படும் இப்படம் தற்போது 6 நாட்களில் ரூ.621.12 கோடியை வசூலித்து மிரட்டி வருகிறது. தற்போது வரை பட்ஜெட்டை விட இரண்டு மடங்கு லாபம் பார்த்துள்ள இப்படம் வார நாட்களிலும் வசூலில் குறையவில்லை. ‘ஜவான்’ படத்தின் வசூலை பாதிக்கும் என கருதப்பட்ட பிரபாஸின் ‘சலார்’ படமும் ஒத்திவைக்கப்பட்டதால் ‘ஜவான்’ ரூ.1000 கோடியைத் தாண்டி பாலிவுட்டில் புதிய சாதனை படைக்கும் என கூறப்படுகிறது.
மேலும், நாளை முதல் வார இறுதி நாட்கள் மீண்டும் தொடங்கும் நிலையில் திங்கட்கிழமை விநாயகர் சதுர்த்தி விடுமுறை வேறு வருவதால், ஜவான் திரைப்படம் ஜெட் வேகத்தில் வசூல் வேட்டையை இரண்டாம் வாரத்திலும் நடத்தும் என எதிர்பார்க்கப்படுகிறது.
