”மனம் நிறைந்துவிட்டது” – நடிகர் சூர்யா நெகிழ்ச்சி பதிவு!

தமிழ் சினிமாவின் அடுத்த பிரம்மாண்ட ரிலீசாக வெளியாக இருப்பது ‘கங்குவா’ படம். சூர்யா நடிப்பில் மிகப் பெரிய எதிர்பார்ப்புடன் உருவாகி வரும் இந்தப்படத்தை சிறுத்தை சிவா இயக்கி வருகிறார். தொடர்ச்சியாக பேமிலி டிராமா படங்களை இயக்கி கமர்ஷியல்ரீதியாக தொடர் வெற்றிகளை கொடுத்து வந்த இயக்குநர் சிவா, தற்போது முதன்முறையாக சூர்யாவுடன் கூட்டணி அமைத்துள்ள ‘கங்குவா’ படத்தினை தனது பாணியிலிருந்து முற்றிலும் வேறு விதமாக இயக்கி வருகிறார்.

3டி தொழில்நுட்பத்தில் பிரம்மாண்டமாக உருவாகி வரும் ‘கங்குவா’ படம் 10 மொழிகளில் தயாராகிறது. இதுவரை இல்லாத அளவிற்கு இரு மடங்கு பட்ஜெட்டில் இந்தப்படத்தினை ஸ்டுடியோ கிரீன் ஞானவேல் ராஜா தயாரித்து வருகிறார். அத்துடன் இந்தப்படத்தில் பல கெட்டப்களில் நடிக்கும் சூர்யா, இதற்காக உடல் எடையை அதிகரித்து மாஸ் லுக்கில் வலம் வருகிறார்.

நடிகர் சூர்யாவின் பிறந்தநாளை முன்னிட்டு ‘கங்குவா’ படத்தின் முதல் கிளிம்ப்ஸ் வீடியோவை நள்ளிரவு 12.01 மணிக்கு படக்குழு வெளியிட்டது. ”ஆழிக்குள் கொடிநட்ட மாறாக்கன் வழி வந்து… வேழத்தை விழ வச்ச கொச்சாமி வழிவந்து..” எனத்தொடங்கும் முதல் கிளிம்ப்ஸ் வீடியோ வெளியாகிய 24 மணி நேரத்தில் 2.2 கோடி பார்வைகளை கடந்து தற்போது இணையதளங்களில் வைரலாகி வருகிறது. சூர்யா ரசிகர்கள் அந்த வீடியோவை கொண்டாடி வருகின்றனர்.

Overwhelmed & humbled… will strive harder… thank you all for your kind wishes and the amazing response for #KanguvaGlimpse feeling blessed!! Special thanks to all my brothers and sisters for doing several welfare activities across the States. Heart-filled! ❤️🙏🏽

— Suriya Sivakumar (@Suriya_offl) July 24, 2023

இந்நிலையில் கிளிம்ப்ஸ்க்கு கிடைத்த வரவேற்பு குறித்து சூர்யா தனது ட்விட்டர் பக்கத்தில் பதிவிட்டுள்ளார். அந்த பதிவில், “கடுமையாக பாடுபடுவேன். உங்கள் அன்பான வாழ்த்துக்களுக்கும் கங்குவா கிளிம்ப்ஸ்க்கு கொடுத்த அற்புதமான வரவேற்புக்கும் நன்றி. மாநிலங்கள் முழுவதும் பல்வேறு நலத்திட்ட செயல்பாடுகளைச் செய்த எனது சகோதர சகோதரிகள் அனைவருக்கும் சிறப்பு நன்றி. மனம் நிறைந்துவிட்டது” என குறிப்பிட்டுள்ளார்.