எச்.வினோத் இயக்கத்தில் நடிகர் கமல்ஹாசன் நடிக்கும் புதிய படத்தின் முன்னணி ஓடிடி நிறுவனம் ஒன்று ரூ.125 கோடிக்கு வாங்கி உள்ளதாகச் தகவல்கள் வெளியாகியுள்ளன.
ஷங்கர் இயக்கத்தில் கமல்ஹாசன் நடித்து வரும் ‘இந்தியன் 2’ படம் மிகவும் விறுவிறுப்பாக நடைபெற்று வருகிறது. ரத்னவேலு, ரவிவர்மன் ஒளிப்பதிவில், ஸ்ரீகர் பிரசாத் படத்தொகுப்பில் உருவாகியுள்ள இந்த படத்தை லைகா மற்றும் ரெட் ஜெயண்ட் மூவீஸ் நிறுவனங்கள் தயாரிக்கின்றன.
இந்தியன் 2 படப்பிடிப்பின் கிளைமாக்ஸ் ஷூட்டிங் சென்னையில் விறுவிறுப்பாக நடைபெற்று வரும் நிலையில் படப்பிடிப்பு தளத்தில் இயக்குநர் ஷங்கர் மற்றும் இசையமைப்பாளர் அனிருத் இருவரும் இணைந்து படத்திற்கான இசையை உருவாக்கி வரும் வீடியோ அண்மையில் வெளியாகி இணையத்தில் வைரலானது.
இப்படத்திற்கு பிறகு கமல், மணிரத்னம் இயக்கத்தில் ‘கேஎச்234’ படத்தில் நடிக்கவுள்ளதாகவும் இப்படத்தின் திரைக்கதை பணிகள் முடிந்து விட்டதாகவும் படப்பிடிப்பு வருகிற ஆகஸ்ட் மாதம் தொடங்கப்படவுள்ளதாகவும் சினிமா வட்டாரங்கள் தெரிவிக்கின்றன.
இந்நிலையில், கமல்ஹாசன் அடுத்ததாக தனது 233 ஆவது படத்தில் எச்.வினோத்துடன் இணையவுள்ளார். அஜித்துடன் தொடர்ந்து 3 படங்களை இயக்கிய நிலையில் கமலுடன் எச்.வினோத் இணையவுள்ள படத்தின் மீது எதிர்பார்ப்பு அதிகம் காணப்படுகிறது. இந்நிலையில் நேற்று ‘KH 233’ படத்தை எச். வினோத் இயக்கவுள்ளது உறுதியாகியுள்ளது. இதற்காக அதிகாரப்பூர்வ அறிவிப்பு விடியோவை ராஜ்கமல் இண்டர்நெஷனல் நிறுவனம் நேற்று வெளியிட்டது.
‘ரைஸ் டூ ரூல்’ என்ற தலைப்பில் வெளியாகிய காட்சிகள் ரசிகர்களிடையே நல்ல வரவேற்பை பெற்றது.எழுத்து – இயக்கம் ஹெச்.வினோத் என அறிவிப்பில் தெரிவிக்கப்பட்டிருந்தாலும், கமல்ஹாசனே படத்திற்கு அரசியல் பின்னணியைக் கொண்டு கதையை எழுதி வருவதாக தகவல் வெளியாகியுள்ளது. இந்த தகவல் ரசிகர்களிடையே மேலும் எதிர்பார்ப்பை ஏற்படுத்தியுள்ளது.
இந்நிலையில், தமிழ், தெலுங்கு, இந்தி உட்பட பல மொழிகளுக்கு இந்த படத்தின் டிஜிட்டல் உரிமையை முன்னணி ஓடிடி நிறுவனம் ஒன்று ரூ.125 கோடிக்கு வாங்கி உள்ளதாகச் தகவல்கள் வெளியாகியுள்ளன. இந்த படத்தின் படபிடிப்பே இன்னும் தொடங்காத நிலையில், இதன் டிஜிட்டல் உரிமை இவ்வளவு கோடிக்கு விற்கப்பட்டிருப்பது ஆச்சரியத்தை ஏற்படுத்தியுள்ளது.
