ராஞ்சியில் இருந்து விமானம் மூலம் சென்னை வந்தடைந்த இந்திய கிரிக்கெட் அணியின் முன்னாள் கேப்டன் எம் எஸ் தோனிக்கு உற்சாக வரவேற்பு அளிக்கப்பட்டது.
‘தல’ தோனி மற்றும் அவரது மனைவி சாக்ஷி தோனி ஆகிய இருவரும் இணைந்து தொடங்கிய தோனி எண்டர்டெயின்மென்ட் நிறுவனத்தின் தயாரிப்பில் உருவாகும் முதல் திரைப்படம் ‘எல்.ஜி.எம்’ (லெட்ஸ் கெட் மேரீட்). அறிமுக இயக்குநர் ரமேஷ் தமிழ்மணி இயக்கத்தில் தயாராகும் இந்த திரைப்படத்தில் நடிகை நதியா, நடிகர் ஹரிஷ் கல்யாண், லவ் டுடே படத்தின் நாயகி இவானா, நகைச்சுவை நடிகர் யோகி பாபு உள்ளிட்ட பலர் நடிக்கிறார்கள்.
விஸ்வஜித் ஒளிப்பதிவு செய்யும் இந்த திரைப்படத்திற்கு ரமேஷ் தமிழ்மணி இசையமைக்கிறார். சாக்ஷி சிங் தோனியின் கருத்தாக்கத்தை மையமாக கொண்டு, குடும்ப பொழுதுபோக்கு அம்சத்துடன் தயாராகிறது. இப்படத்தின் படப்பிடிப்பு கடந்த ஜனவரி 28-ம் தேதி சென்னையில் பூஜையுடன் தொடங்கியது. இந்த படத்தின் படப்பிடிப்பு விறுவிறுப்பாக நடைபெற்று வந்த நிலையில் தற்போது இந்த படத்தின் படப்பிடிப்பு இறுதி கட்டத்தை நெருங்கி உள்ளதாக கூறப்படுகிறது.
சமீபத்தில் ‘எல்.ஜி.எம்’ படத்தின் டீசரை படக்குழு வெளியிட்டது. தொடர்ந்து படத்தில் இடம் பெற்றுள்ள ‘சலனா’ என்ற பாடலை வெளியிட்டது. இந்த பாடல் ரசிகர்களிடையே நல்ல வரவேற்பை பெற்றதோடு, எதிர்பார்ப்பையும் அதிகரிக்க செய்துள்ளது. இந்நிலையில், இந்த படம் விரைவில் வெளியாக உள்ள நிலையில் நாளை ஜூலை 10ம் தேதி சென்னையில் இந்த படத்தின் இசை மற்றும் ட்ரெய்லர் வெளியீட்டு விழா நடைபெற உள்ளது. இந்த விழாவில் எம்.எஸ்.தோனி மற்றும் அவரது மனைவி சாக்க்ஷியும் கலந்து கொள்கின்றனர்.
லீலா பேலஸில் நாளை நடைபெற இருக்கும் இப்படத்தின் ஆடியோ வெளியீடு நிகழ்ச்சியில் பங்கேற்பதற்காக ராஞ்சியில் இருந்து இந்திய கிரிக்கெட் அணியின் முன்னாள் கேப்டனும் சென்னை சூப்பர் கிங்ஸ் அணியின் கேப்டனான எம் எஸ் தோனி மற்றும் அவரது மனைவி சாக்ஷி ஆகியோர் விமான மூலம் சென்னை விமான நிலையம் வந்தடைந்தனர்.
சென்னை விமான நிலையத்தில் இருந்த தோனி ரசிகர்கள் அவருக்கு உற்சாக வரவேற்பு அளித்தனர். இதனையடுத்து லீலா பேலஸில் தங்குவதற்காக கார் மூலம் புறப்பட்டு சென்றார். இசை வெளியீட்டு விழாவில் தோனி கலந்து கொள்வதால் இந்த படத்தின் பரபரப்பு கூடியுள்ளது.
