நடிகர் ஷாருக்கானுக்கு அமெரிக்காவில் நடந்த படப்பிடிப்பின் போது விபத்து ஏற்பட்டதில் மூக்கில் காயம் ஏற்பட்டதை அடுத்து, அவருக்கு அறுவை சிகிச்சை செய்யப்பட்டதாக தகவல் வெளியாகியுள்ளது.
அட்லி இயக்கத்தில் ஜவான்’ படத்தில் ஷாருக்கான் நடித்து வருகிறார். இதில் நயன்தாரா, விஜய் சேதுபதி இருவரும் முக்கிய கதாபாத்திரங்களில் நடித்து வருகின்றனர். மேலும், தீபிகா படுகோன், சஞ்சய் தத் ஆகியோர் கவுரவ தோற்றத்தில் நடித்துள்ளனர். அனிருத் இசையில் இந்தி, தமிழ், தெலுங்கு மொழிகளில் இந்தப் படம் வெளியாக உள்ளது.
இந்நிலையில் ஜவான் திரைப்படத்துடன் ’தங்ஹி’ என்ற திரைப்படத்திலும் ஷாருக்கான் நடித்து வருகிறார். இத்திரைப்படத்துக்காக அமெரிக்காவின் லாஸ் ஏஞ்சல்ஸ் நகரத்துக்கு ஷாருக்கான் அண்மையில் சென்றிருந்தார்.அங்கு படப்பிடிப்பு தளத்தில் நடந்த விபத்தில் ஷாருக்கானின் மூக்கில் பலத்த காயம் ஏற்பட்டிருக்கிறது. உடனடியாக மருத்துவமனைக்கு அழைத்துச் செல்லப்பட்ட ஷாருக்கானுக்கு அங்கு அறுவை சிகிச்சை செய்யப்பட்டதாகவும் தகவல் வெளியாகியுள்ளது.
இந்நிலையில், இந்தியா திரும்பியுள்ள ஷாருக் கான் தற்போது நலமுடன் இருப்பதாகவும், காயம் சரியானதும் மீண்டும் படப்பிடிப்பில் கலந்து கொள்வார் என்றும் தெரிகிறது. ஷாருக்கான் படப்பிடிப்பு விபத்தில் சிக்கினார் என்ற தகவல் அவரது ரசிகர்களிடையே அதிர்ச்சியை ஏற்படுத்திய நிலையில், அவர் நலமுடன் உள்ளார் என்ற தகவல் தற்போது வெளியாகியுள்ளதால் ரசிகர்கள் நிம்மதி அடைந்துள்ளனர்.
