ஜல்லிக்கட்டு போட்டிக்கு தடை விதிக்க முடியாது என உச்சநீதிமன்றம் தீர்ப்பு வழங்கியுள்ளது. உச்சநீதிமன்ற தீர்ப்பின் முக்கிய அம்சங்கள் குறித்து விரிவாக காண்போம்.
ஜல்லிக்கட்டு, கம்பாலா உள்ளிட்ட காளைகளை வைத்து நடத்தப்படும் விளையாட்டுகளுக்கு அனுமதி வழங்கும் வகையில் தமிழ்நாடு உள்ளிட்ட மாநில அரசுகள் கொண்டு வந்த சட்டங்களுக்கு எதிராக விலங்குகள் நல வாரியம் தொடர்ந்த மனு மீதான விசாரணை உச்சநீதிமன்ற நீதிபதி கே எம் ஜோசப் தலைமையிலான ஐந்து பேர் கொண்ட அரசியல் சாசன அமர்வில் விசாரிக்கப்பட்டது.
விரிவாக விசாரணை நடத்தப்பட்ட நிலையில் அனைத்து தரப்பு வாதங்களும் நிறைவடைந்தது. இந்த வழக்கினை விசாரித்த உச்ச நீதிமன்ற நீதிபதி கே எம் ஜோசப் அடுத்த மாதம் ஓய்வு பெறுகிறார். கோடை விடுமுறை வரும் சனிக்கிழமை முதல் தொடங்க உள்ள நிலையில் இன்று ஜல்லிக்கட்டு வழக்கில் தீர்ப்பு வழங்கப்பட்டது.
நீதிபதி கே.எம்.ஜோசப் தலைமையில், நீதிபதிகள் அஜய் ரஸ்தோஹி, அனிருத்தா போஸ், ரிஷிகேஷ் ராய், சி.டி.ரவிக்குமார் ஆகியோர் அடங்கிய அரசியல் சாசன அமர்வு தீர்ப்பினை வாசித்தது.
தீர்ப்பின் முக்கிய அம்சங்கள் :
-ஜல்லிக்கட்டுக்கு தொடர்பாக அனுப்பப்பட்ட ஐந்து கேள்விகளுக்கும் தமிழ்நாடு அரசு திருப்திகரமான பதில் அளித்துள்ளது. எனவே ஜல்லிக்கட்டு பாரம்பரிய விளையாட்டு என்பதை ஏற்கிறோம.
– ஜல்லிக்கட்டு பாரம்பரியம், கலாச்சாரத்தோடு ஒன்றிணைந்தது. இது ஆயிரம் ஆண்டுகளுக்கு முன்பிருந்தே கடைபிடிக்கப்பட்டு வருகிறது. ஜல்லிக்கட்டு தமிழ்நாட்டின் கலாச்சாரத்தோடு ஒன்றினைந்தது என தமிழ்நாடு அரசு கொண்டு வந்த சட்ட திருத்தத்தில் குறிப்பிடப்பட்டுள்ளது. அதனை ஏற்றுக் கொள்கிறோம்.
– தமிழ்நாடு அரசின் சட்டம் காளைகளுக்கு ஏற்படும் கொடுமையை பெரும்பான்மையாக குறைத்துள்ளது. கலாச்சாரம் என்ற வகையில் இருந்தாலும் கூட அதில் துன்புறுத்தல் என்று வரும் பொழுது அதனை தவிர்ப்பதற்கான வழிமுறைகள் முழுமையாக கடைபிடிக்கப்பட வேண்டும்.
– ஜல்லிக்கட்டுக்கு தடை இல்லை. தமிழ்நாடு அரசின் அவசர சட்டம் செல்லும். ஜல்லிக்கட்டுக்கு எதிரான அனைத்து மனுக்களும் தள்ளுபடி செய்யப்படுகின்றன.
– தமிழ்நாடு சட்டத்தின் அடிப்படையில் மகாராஷ்டிரா, கர்நாடாக மாநிலமும் சட்ட திருத்தத்தை மேற்கொள்ள வேண்டும் தமிழக அரசின் சட்டம் அரசியல் சாசனத்தின் 14 மற்றும் 21ஐ மீறுவதாக இல்லை. ஜல்லிக்கட்டை அனுமதிக்கும் வகையில் தமிழ்நாடு சட்டமன்றம் கொண்டு வந்த முயற்சிகளில் நீதிமன்றம் தலையிட விரும்பவில்லை.
