“ஊரும் உணவும் – இது உங்க ஊர் திருவிழா” என்ற பெயரில் நியூஸ் 7 தமிழ் தொலைக்காட்சி சார்பில் சிவகங்கை மாவட்டம் காரைக்குடியில் உள்ள பாண்டியன் மைதானத்தில் உணவுத் திருவிழா நடைபெற உள்ளது.
“ஊரும் உணவும் – இது உங்க ஊர் திருவிழா” என்ற பெயரில் நியூஸ் 7 தமிழ் தொலைக்காட்சி சார்பில் சிவகங்கை மாவட்டம் காரைக்குடியில் உள்ள பாண்டியன் மைதானத்தில் நாளையும், நாளை மறுநாள் ( ஏப்ரல் 8 மற்றும் 9 ) உணவுத் திருவிழா நடைபெறுகிறது. கட்டணம் எதுவுமில்லாமல் இலவசமாக இந்த உணவுத் திருவிழாவில் பங்கேற்கலாம்.
மதுரை, ஓசூரை தொடர்ந்து நியூஸ் 7 தமிழ் சார்பில் பிரம்மாண்ட நடைபெறும் ஊரும் உணவும் திருவிழாவின் முக்கிய நிகழ்ச்சியாக பாரம்பரிய விளையாட்டுப் போட்டிகளும் சவால்களும் களைகட்டுகின்றன. திறமைகளை வெளிப்படுத்துபவர்களுக்கு பரிசும் வழங்கப்படுகிறது. சனி மற்றும் ஞாயிற்றுக்கிழமை நண்பகல் 12 மணிக்குத் தொடங்கி இரவு 10 மணிக்கு நிறைவடைகிறது.
தமிழ்நாட்டின் பல்வேறு பாரம்பரிய உணவு வகைகளை ஒரே இடத்தில் சங்கமிக்க வைக்கும் வகையில் ஊரும் உணவும் திருவிழாவை நியூஸ் 7 தமிழ் நடத்தி வருகிறது. அந்த வகையில் கடந்தாண்டு ஆகஸ்ட் 6 மற்றும் 7 ஆகிய தேதிகளில் மதுரையில் முதன் முதலாக ஊரும் உணவும் திருவிழா நடைபெற்றது. இந்த திருவிழாவில் உணவு வகைகள் மட்டுமின்றி பாரம்பரிய விளையாட்டுகள் மற்றும் போட்டிகளும் நடத்தப்பட்டன. நியூஸ் 7 தமிழின் இந்த புதிய முயற்சிக்கு மதுரை மக்கள் அமோக ஆதரவு தெரிவித்தனர்.
இதனைத் தொடர்ந்து ஓசூரில் கடந்த பிப்ரவரி 18 மற்றும் 19 ஆகிய இரு நாட்கள் நியூஸ் 7 தமிழ் சார்பில் ஊரும் உணவும் திருவிழா விமரிசையாக நடைபெற்றது.
உணவுத் திருவிழாவில் இடம்பெறும் உணவு வகைகள்:
தூத்துக்குடி மக்ரூன், கிருஷ்ணகிரி நைஸ் பால்கோவா, காரமடை தேர் மிட்டாய், சீர்காழி பருத்தி பால் அல்வா, தூத்துக்குடி கருப்பட்டி இனிப்புகள், காரைக்கால் அல்வா மற்றும் ஜாமூன், தஞ்சாவூர் அசோகா அல்வா, திண்டிவணம் முட்டை மிட்டாய், சேலம் மற்றும் கரூர் தட்டு வடக்கடை, அலங்காநல்லூர் பால் பன், திருச்சி அக்கார வடிசல், சேலம் மூலிகை தந்தூரி டீ, ஊத்துக்குளி வெண்ணெய், ஹனி பீடா, அம்பாசமுத்திரம் அரிசி அப்பளம், ஊட்டி வறுக்கி, மார்த்தாண்டம் தேன், உடுமலை பருப்பு சாதம், ஹோகேனக்கல் மீன் சாப்பாடு, ஆம்பூர் பிரியாணி, பள்ளிபாளையம் சிக்கன், கருப்பு கவுனி ஐஸ்கிரீம், மணப்பாறை முறுக்கு, தஞ்சாவூர் சந்திரகலா, 25 வகை சர்பத், நெல்லை இடியாப்பம் சொதி, திருப்பத்தூர் மக்கன்பேடா, திண்டுக்கல் வாழை இலை பரோட்டா, கீழக்கரை துதல் தொல் அல்வா, ஊட்டி ஹோம் மேட் சாக்லேட்ஸ், திண்டுக்கல் சீரகசம்பா பிரியாணி, மதுரை முயல் கறி, பள்ளிபாளையம் சிக்கன், நாமக்கல் முட்டை, ஊத்துக்குளி வெண்ணெய், பன்ருட்டி முந்திரி, பாண்டிச்சேரி கமரக்கட்டு, சேலம் ஜவ்வரிசி இனிப்புகள், நாகை பனங்கிழங்கு கேக், கரூர் கரம்ஸ், மாஞ்சோலை டீ உள்ளிட்ட உணவு வகைகள் இடம்பெறவுள்ளன.
