உடல்நலக் குறைவால் பாதிக்கப்பட்டுள்ள மலையாள நடிகர் சீனிவாசனை மோகன்லால் கட்டியணைத்து கன்னத்தில் முத்தமிட்டார்.
மலையாள திரையுலகில் கடந்த 40 ஆண்டுகளாக குணச்சித்திர நடிகராக நடித்து ரசிகர்களிடம் வரவேற்பைப் பெற்றவர் பிரபல நடிகர் சீனிவாசன். மேலும் கதாசிரியர், இயக்குநர், பாடலாசிரியர் என இன்னும் சில முகங்களும் இவருக்கு உண்டு. இவரது மகன்கள் வினீத் சீனிவாசன் மற்றும் தயன் சீனிவாசன் இருவரும் மலையாளத் திரையுலகில் இயக்குநர்களாக, நடிகர்களாக இருக்கின்றனர்.
சமீபகாலமாக நடிகர் சீனிவாசன் படங்களில் நடிப்பதைக் குறைத்துக் கொண்டார். காரணம் கடந்த சில மாதங்களாகவே அவர் உடல் நலக் குறைவால் அவதிப்பட்டு வந்தார். சமீபத்தில் கூட திடீரென அவரது உடல்நிலை மோசமானதால் மருத்துவமனையில் அனுமதிக்கப்பட்டு பின் குணமாகி வீடு திரும்பினார். இருந்தாலும் அவரது உடல் மெலிந்து முகத்தோற்றம் ரொம்பவே மாறிவிட்டது ரசிகர்களை வருத்தமடைய வைத்தது.
இந்த நிலையில், மலையாள நடிகர் சங்க கலை நிகழ்ச்சியில் கலந்துகொள்ள வருகை தந்தார் சீனிவாசன். அவரைக் கண்டதும் அவருடன் பல படங்களில் இணைந்து நடித்த அவருக்கு நெருங்கிய நண்பர்களான மோகன்லால், மம்முட்டி இருவரும் மகிழ்ச்சியும் நெகிழ்ச்சியுமாக அவரை வரவேற்றனர். கண்கலங்கிய மோகன்லால் அவரை கட்டியணைதது கன்னத்தில் முத்தமிட்டு தனது அன்பை வெளிப்படுத்தினார்.
-ம.பவித்ரா
