நடிகர் சூர்யா நடித்த “கங்குவா” திரைப்படத்தின் கிளிம்ப்ஸ் வீடியோ ஜூலை 23ம் தேதி வெளியாகும் என படக்குழு போஸ்டர் மூலம் தெரிவித்துள்ளனர்.
தமிழ் சினிமாவின் முன்னணி நட்சத்திரமான சூர்யாவின் நடிப்பில் சமீபகாலமாக வெளிவந்த எதற்கும் துணிந்தவன், ஜெய் பீம், சூரரை போற்று உள்ளிட்ட படங்கள் ரசிகர்கள் மத்தியில் வரவேற்பை பெற்றன. இந்நிலையில், சிறுத்தை சிவா இயக்கத்தில் கங்குவா என்னும் படத்தில் நடிகர் சூர்யா தற்போது நடித்துவருகிறார்.
ஸ்டுடியோ க்ரீன் தயாரிப்பில் உருவாக்கும் இப்படத்தில் பாலிவுட் நடிகை திஷா பதானி, யோகி பாபு, கிங்ஸ்லி, கோவை சரளா, ஆனந்த் ராஜ் உள்ளிட்ட பலர் முக்கிய கதாபாத்திரங்களில் நடிக்கின்றனர். சுமார் பத்துக்கும் மேற்பட்ட மொழிகளில் உருவாகி வரும் இந்த படத்திற்கு தேவி ஸ்ரீபிரசாத் இசையமைக்கிறார்.
இந்த படத்தின் ஷூட்டிங் விறுவிறுப்பாக நடந்து வருகிறது. இப்படம் பான் இந்தியா படமாக வெளியாக உள்ளது. பல கதாபாத்திரத்தில் நடிப்பதாக சொல்லப்படும் சூர்யா இந்த படத்தின் பிளாஷ்பேக் காட்சிகளுக்காக உடல் எடையை ஏற்றி இருக்கிறார். சமீபத்தில் இவர் உடற்பயிற்சி செய்யும் புகைப்படம் மற்றும் வீடியோக்கள் வெளியாகி வைரலானது.
வருகின்ற ஜூலை 23-ம் தேதி நடிகர் சூர்யாவின் பிறந்தநாளை முன்னிட்டு கங்குவா படத்தின் கிளிம்ப்ஸ் வீடியோ வெளியாவது குறித்து படக்குழு போஸ்டர் ஒன்றை வெளியீட்டுள்ளது. அந்த போஸ்டரில் ஒன் மேன், ஒன் வொல்ட், ஒன் ஸ்டோரி என குறிப்பிடப்பட்டிருந்தது. இந்த திரைப்படம் கற்பனை கலந்த வரலாற்று பின்னணியில் உருவான தகவல்கள் வெளிவந்த நிலையில், ரசிகர்கள் ஃபேன்மேட் போஸ்டர் மூலம் திரைப்படம் குறித்து எதிர்பார்ப்பை மேலும் அதிகப்படுத்தி வருகின்றனர்.
