பொருளாதார வளர்ச்சிக்கான முடிவுகள் எடுக்கும் இடத்தில் பெண்களுக்கு முக்கியத்துவம் அளிப்பது உள்ளிட்ட பல்வேறு தீர்மானங்கள் டெல்லியில் நடைபெற்று வரும் ஜி20 மாநாட்டில் நிறைவேற்றப்பட்டன.
சர்வதேச அளவில் மிக முக்கிய பொருளாதார அமைப்பாக திகழும் ஜி20 கூட்டமைப்பின் மாநாடு டெல்லியில் தொடங்கியது. இந்தியா தலைமையில் நடைபெறும் இந்த மாநாட்டில் அமெரிக்கா, சீனா, ஜப்பான், ஜெர்மனி, ரஷ்யா, பிரிட்டன், பிரேசில் உள்ளிட்ட 20 நாடுகளின் தலைவர்கள் பங்கேற்றுள்ளனர்.
ஜி20 மாநாடு நடைபெறும் பாரத் மண்டபத்திற்கு வருகை தந்த உறுப்பு நாடுகளின் தலைவர்களை பிரதமர் மோடி வரவேற்றார். மாநாட்டு அரங்கில் பிரதமர் மோடியின் இருக்கைக்கு முன், இந்தியா என்பதற்கு பதிலாக பாரத் என பொறிக்கப்பட்ட பெயர் பலகை வைக்கப்பட்டிருந்தது.
இந்த மாநாட்டில், ஆப்பிரிக்க யூனியன் 21-வது உறுப்பு நாடாக ஜி20 கூட்டமைப்பில் இணைந்தது. இதன்மூலம் ஜி20 கூட்டமைப்பில் உள்ள நாடுகளின் எண்ணிக்கை 21 ஆக உயர்ந்துள்ளது. ஜி20 உச்சி மாநாட்டில் ‘ஒரே பூமி’ என்ற தலைப்பில் பேசிய பிரதமர் மோடி, எத்தனால் கலப்பதை 20 சதவீதம் வரை அதிகரிக்க, உலக அளவில் முன்முயற்சி எடுக்க வேண்டும் என்பதே இந்தியாவின் முன்மொழிவு என்றும்,
இதற்காக உலகளாவிய பயோ எரிபொருள் கூட்டணி அமைக்கப்படும் என்றும் குறிப்பிட்டார். எரிபொருள் கலப்பு விஷயத்தில் அனைத்து நாடுகளும் ஒன்றிணைந்து செயல்பட வேண்டியது இன்றைய காலத்தின் தேவை என்று பிரதமர் தெரிவித்தார். இந்த முயற்சியில் ஜி20 நாடுகள் இணைய வேண்டும் என்றும் அவர் வலியுறுத்தினார். சுற்றுச்சூழல் மற்றும் காலநிலை கண்காணிப்புக்கான ஜி20 செயற்கைக்கோள் திட்டத்தை செயல்படுத்த வேண்டும் பிரதமர் மோடி கேட்டுக்கொண்டார்.
ஜி20 மாநாட்டில், பெண்கள் முன்னேற்றத்திற்காக புதிய செயற்குழு அமைக்க ஒருமனதாக தீர்மானம் நிறைவேற்றப்பட்டது. பொருளாதார வளர்ச்சிக்கான முடிவுகள் எடுக்கும் இடத்தில் பெண்களுக்கு முக்கியத்துவம் தரவும், அதன்படி, பாலின இடைவெளியை குறைத்து சமமான வாய்ப்புகளை வழங்கி பெண்களை ஊக்குவிக்கவும் வேண்டும் எனவும் அதில் கூறப்பட்டுள்ளது.
உக்ரைனில் நீடித்த அமைதி நிலவ பேச்சுவார்த்தை மூலம் தீர்வு காண நடவடிக்கை எடுக்க வேண்டும் என தீர்மானம் நிறைவேற்றப்பட்டது. மேலும், பசுமை இல்ல வாயுக்கள் வெளியிடுதலை 2030-க்குள் 43 சதவீதம் அளவுக்கு குறைக்க கவனம் செலுத்த வேண்டும் என்றும், அணு ஆயுதம் பயன்படுத்துவதையோ, அணு ஆயுத தாக்குதல் தொடர்பாக மிரட்டுவதையோ ஏற்க முடியாது என ஜி-20 மாநாட்டில் பிரகடனம் செய்யப்பட்டுள்ளது.
அணுசக்தி நீர்மூழ்கி கப்பலை தயாரித்துள்ளதாக அறிவித்த வடகொரியாவுக்கு ஜி-20 நாடுகள் கண்டனம் தெரிவித்து தீர்மானம் நிறைவேற்றப்பட்டது. மேலும், சந்திரயான்-3 திட்ட வெற்றிக்காகவும் உறுப்பு நாடுகள் சார்பில் இந்தியாவுக்கு பாராட்டு தெரிவிக்கப்பட்டன. சர்வதேச நிதி அமைப்புகளை சீரமைக்க ஜி20 கூட்டமைப்பின் தலைவர்கள் ஒப்புதல் அளித்துள்ளதாக மத்திய வெளியுறவுத் துறை அமைச்சர் ஜெய்சங்கர் தெரிவித்துள்ளார்.
ஜி20 மாநாடு தீர்மானம் தொடர்பாக இந்திய சார்பில் அறிக்கையை வெளியிட்டு பேசிய அவர், ஒரே பூமி, ஒரே குடும்பம், ஒரே எதிர்காலத்தை பகிர்ந்து கொள்வோம் என்பதே ஜி 20 மாநாட்டின் தகவல் என்றார். இந்தியா தலைமையின் கீழ் ஆப்பிரிக்க யூனியன் ஜி 20 அமைப்பின் நிரந்தர உறுப்பினரானது திருப்தியளிக்கிறது என்றும் அவர் குறிப்பிட்டார்.
