இந்திய சர்வதேச திரைப்பட விழாவில் திரையிடப்படவுள்ள படங்களின் பட்டியல் வெளியாகியுள்ளது.
இந்திய சர்வதேச திரைப்பட விழா (IFFI) கடந்த 1952ம் ஆண்டு முதல் வருடந்தோறும் நடைபெற்று வருகிறது. அதன்படி இந்தாண்டுக்கான சர்வதேச திரைப்பட விழா கோவாவில் கடந்த நவம்பர் மாதம் 20ம் தேதி முதல் 28ம் தேதி வரை நடைபெறும் என அறிவிக்கப்பட்டிருந்தது. ஆனால் கொரோனா அச்சுறுத்தல் காரணமாக இந்த விழா ஒத்திவைக்கப்பட்டது.
இந்நிலையில் 51-வது கோவா சர்வதேச திரைப்பட விழா ஜனவரி 16-ம் தேதி முதல் 25-ம் தேதி வரை நடைபெறவுள்ளதாக அறிவிக்கப்பட்டுள்ளது. இதில் பல்வேறு மொழித் திரைப்படங்களுடன் சேர்த்து இந்திய மொழித் திரைப்படங்களும் திரையிடப்படும். அந்த வகையில், இந்திய பனோரமா பிரிவில் 2 தமிழ் படங்கள் திரையிட தேர்வாகியுள்ளது. வெற்றிமாறன் இயக்கத்தில் தனுஷ் நடித்திருந்த அசுரன் படம் மற்றும் கணேஷ் விநாயகன் இயக்கத்தில் உருவாகியுள்ள ‘தேன்’ திரைப்படமும் திரையிடப்படவுள்ளது. இவற்றில் தேன் திரைப்படம் இன்னும் வெளியாகவில்லை என்பது குறிப்பிடத்தக்கது.
இந்த வரிசையில் மலையாள பிரிவில் அன்னா பென் நடிப்பில் வெளியாகி நல்ல வரவேற்பை பெற்ற கப்பேலா திரைப்படம் தேர்வாகியுள்ளது. காதலை மையாக கொண்டு உருவான இத்திரைப்படத்தை முஸ்தபா இயக்கியிருந்தார். இதே போன்று இந்தி பிரிவில் மறைந்த நடிகர் சுஷாந்த் சிங் ராஜ்புத் நடிப்பில் வெளியான சிச்சோரா திரைப்படம் தேர்வாகியுள்ளது. இத்திரைப்படம் உயிரிழப்புக்கு முயலும் மகனுக்கு தோல்வியை எவ்வாறு எதிர்கொள்ள வேண்டும் என தந்தை உணர்த்தும் விதமாக உருவாகியிருந்தது குறிப்பிடத்தக்கது.
