தமிழ்நாடு அரசில் அமைச்சராக பதவியேற்க உள்ள டிஆர்பி ராஜா கடந்து வந்த பாதையை பார்ப்போம்…
தமிழ்நாடு அமைச்சரவை கூட்டம் கடந்த 2ம் தேதி நடைபெற்றது. இக்கூட்டத்தில் பல்வேறு விவகாரங்கள் குறித்து ஆலோசிக்கப்பட்ட நிலையில், அமைச்சரவை மாற்றம் பற்றியும் விவாதிக்கப்பட்டதாக கூறப்படுகிறது. இதனைத் தொடர்ந்து வரும் மே 11ஆம் தேதி தமிழ்நாடு அமைச்சரவை மாற்றம் நடைபெற உள்ளதாகவும், புதிய அமைச்சரவையில் மன்னார்குடி எம்.எல்.ஏ டிஆர்பி ராஜா இடம்பெறுவார் எனவும், சில அமைச்சர்களின் இலாகாக்கள் மாற்றம் செய்யப்பட உள்ளன. புதிதாக அமைச்சராக உள்ள டி.ஆர்.பி.ராஜா யார் எனபதை குறித்து விரிவாக காண்போம்.
திராவிட முன்னேற்ற கழகத்தின் பொருளாளரும், கட்சியின் நாடாளுமன்றக்குழு தலைவர் மற்றும் முன்னாள் மத்திய அமைச்சருமான டி.ஆர்.பாலுவின் மகன்தான் டிஆர்பி ராஜா.
1976ஆம் ஆண்டு ஜூலை 12-ல், பிறந்த டிஆர்பி ராஜா, தனது பள்ளிப் படிப்பை சென்னை கிறிஸ்துவ பள்ளியிலும் கல்லூரிப் படிப்பை சென்னை லயோலா கல்லூரி மற்றும் சென்னை பல்கலைகழகத்தில் பயின்றவர். இவர் உளவியலில் முதுகலை மற்றும் முனைவர் பட்டம் பெற்றவர். இவருக்கு திருமணமாகி இரண்டு குழந்தைகள் உள்ளன.
கல்லூரி மற்றும் தொழில் நிறுவனங்களை நடத்திய அனுபவம் கொண்ட டிஆர்பி ராஜா திமுக-வின் அயல்நாடு வாழ் தமிழர் பிரிவின் முதல் செயலாளராக இருந்தார். தற்போது திமுகவின் தகவல் தொழில் நுட்ப பிரிவு செயலாளராக உள்ளார்.
டி.ஆர்.பி.ராஜா திருவாரூர் மாவட்டம், மன்னார்குடி தொகுதியில் இருந்து, 2011, 2016, 2021ஆம் ஆண்டுகளில் தொடர்ச்சியாக வெற்றி பெற்று சட்டமன்ற உறுப்பினராக தேர்ந்தெடுக்கப்பட்டார்.
இதேபோல டிஆர்பி ராஜா சட்டப்பேரவையில் பல்வேறு குழுக்களில் உறுப்பினராகவும், பல்கலைக்கழகங்களில் செனட் உறுப்பினராகவும் இருந்துள்ளார்.தமிழ்நாடு அரசின் திட்டக்குழு உறுப்பினராகவும் உள்ள டிஆர்பி ராஜா தற்போது அமைச்சராகிறார்.
