தளபதி விஜய், லோகேஷ் கனகராஜ் கூட்டணியில் உருவாகி வரும் லியோ படத்தின் நா ரெடி தா பாடல் 10 கோடி பார்வைகளைக் கடந்துள்ளது.

லோகேஷ் கனகராஜ் இயக்கத்தில் விஜய், த்ரிஷா நடித்து வரும் படம் ‘லியோ’. கவுதம் வாசுதேவ் மேனன், அர்ஜுன், மிஷ்கின், பிரியா ஆனந்த், மன்சூர் அலிகான், சஞ்சய் தத் உட்பட பலர் இதில் நடிக்கின்றனர். மனோஜ் பரமஹம்சா ஒளிப்பதிவு செய்கிறார். அனிருத் இசை அமைக்கிறார். செவன் ஸ்கிரீன் நிறுவனம் படத்தைத் தயாரிக்கிறது. தற்போது படத்தின் மொத்த படப்பிடிப்பும் நிறைவடைந்து, இப்படம் வரும் அக்டோபர் 19-ம் தேதி திரையரங்குகளில் வெளியாக உள்ளது. லியோ திரைப்படம் வெளிவர இன்னும் இரண்டு மாதங்கள் உள்ள நிலையில், படத்தின் போஸ்ட் புரொடக்ஷன் பணிகள் விறுவிறுப்பாக நடைபெற்று வருவதாக தெரிகிறது.

விஜய்யின் ‘லியோ’ படத்தில் வில்லனாக நடித்துள்ள சஞ்சய் தத்தின் லுக்கை வெளிப்படுத்தும் கிளிம்ப்ஸ் வீடியோவை அவரது பிறந்தநாளை முன்னிட்டு சில தினங்களுக்கு முன்பு படக்குழு வெளியிட்டது. அதேபோல் நடிகர் அர்ஜுன் பிறந்தநாளான நேற்று லியோ படத்தின் தயாரிப்பு நிறுவனமான செவன் ஸ்கிரீன் தங்களது சமூக வலைதள பக்கத்தில் புதிய கிளிம்ஸ் வீடியோவை வெளியிட்டு அதில் ‘ஹரோல்ட் தாஸ்’ என்கிற அர்ஜுன் கதாபாத்திர பெயரையும் குறிப்பிட்டு பிறந்தநாள் வாழ்த்து தெரிவித்தது.

அதேபோல் நடிகர் விஜய் பிறந்தநாளான ஜூன் 22ஆம் தேதி அன்று ‘லியோ’ திரைப்படத்தின் முதல் பாடலான “நா ரெடி” என்ற பாடலின் முழு லிரிக்கல் வீடியோ வெளியானது. இந்த பாடல் வீடியோ சமூக வலைதளங்களில் தொடர்ந்து வைரலாகி வருவதோடு, விஜய் ரசிகர்கள் இந்த பாடலை தற்போதும் கொண்டாடி வருகின்றனர். அந்த வகையில், லியோ படத்தின் நா ரெடி தா பாடல் 10 கோடி பார்வைகளைக் கடந்துள்ளது.

இந்த பாடல் வெளியான Youtube சேனலில் 10 கோடிக்கும் அதிகமான பார்வைகளைப் பெற்றுள்ளது. 25 லட்சத்துக்கும் அதிகமான லைக்குகளை பெற்றுள்ளது. அனிருத் ரவிச்சந்தரின் ஆத்மார்த்தமான இசையாலும் , விஜய்யின் மெட்டுகளாலும் இந்தப் பாடல் ராசிகளுக்கு பெரும் கிரேஸாக அமைந்தது. இந்தப் பாடல் இன்னும் தெலுங்கில் வெளியாகவில்லை. இதற்காக ரசிகர்கள் ஆவலுடன் காத்திருக்கின்றனர்.

இந்த நிலையில், கடந்த காலத்தில் , வாரிசு படத்தின் ரஞ்சிதாமே, அரபி குத்து , மாஸ்டரில் இருந்து வாத்தி கம்மிங் ஆகிய பாடல்கள் 10 கோடிக்கும் அதிகமான பார்வைகளைப் பெற்ற நிலையில், தற்போது நா ரெடி தா பாடல் ஒரு மாதத்திற்குள் 10 கோடிக்கும் அதிகமான பார்வைகளைப் பெற்றுள்ளது. 10 கோடிக்கும் அதிகமான பார்வைகளைப் பெற்ற விஜய்யின் நான்காவது லிரிகல் பாடல் இதுவாகும். கடந்த ஆண்டு கமல்ஹாசனை வைத்து விக்ரம் போன்ற சூப்பர் டூப்பர் ஹிட் கொடுத்த லோகேஷ் கனகராஜ், விஜய்யை வைத்து லியோ படம் எடுத்துள்ளதால், இந்த கூட்டணி ஆல் டைம் ரெக்கார்டுகளை முறியடிக்கும் என எதிர்பார்க்கப்படுகிறது.