”அட்லி ஹாலிவுட் போனால் அவருடன் நானும் சென்றுவிடுவேன் “ என ஜவான் இசை வெளியீட்டு விழாவில் நடிகர் யோகிபாபு தெரிவித்துள்ளார்.
இயக்குநர் அட்லி, ஷாருக்கானின் ஜவான் படத்தின் மூலம் பாலிவுட்டில் இயக்குநராக அறிமுகமாகிறார். இந்தப் படத்தில் ஷாருக்கான் இரண்டு வேடங்களில் நடிக்கிறார். நயன்தாரா, தீபிகா படுகோனே, விஜய் சேதுபதி, யோகி பாபு, பிரியாமணி உள்ளிட்டோரும் முக்கிய கதாபாத்திரத்தில் நடிக்கின்றனர்.
தமிழ், தெலுங்கு, மலையாளம், கன்னடம், ஹிந்தி ஆகிய மொழிகளில் இப்படம் வெளியாகிறது. இப்படத்திற்கு இசையமைப்பாளர் அனிருத் இசையமைத்துள்ளார். ஜவான் திரைப்படம் உலகம் முழுவதும் செப்டம்பர் 7-ம் தேதி வெளியாகிறது.
ஜவான் படத்தின் இசை வெளியீட்டு விழா இன்று நடைபெறும் என படக்குழு அறிவித்திருந்தது. இதனிடையே இன்று மாலை சென்னை தாம்பரத்தில் உள்ள தனியர் கல்லூரியில் நடைபெறும் இசை வெளியீட்டு விழாவுக்காக பிரமாண்ட ஏற்பாடுகள் செய்யப்பட்டுள்ளன.
ஜவான் படத்தின் இசை வெளியீட்டு விழா மாலை தொடங்கியது. இந்த விழாவில் நடிகர் ஷாருக்கான், இசையமைப்பாளர் அனிருத், இயக்குநர் அட்லீ , விக்னேஷ் சிவன், விஜய் சேதுபதி , யோகி பாபு ஆகியோர் பங்கேற்றுள்ளனர்.
இசை வெளியீட்டு விழாவுக்காக மாஸ் எண்ட்ரி கொடுத்த நடிகர் ஷாருக்கானுக்கு பலத்த வரவேற்புடன் ரசிகர்கள் உற்சாகமூட்டினர். இதனைத் தொடர்ந்து நடிகர் ஷாருக்கான் விஜய் சேதுபதி கட்டி அணைத்தார், மேலும் இசையமைப்பாளர் அனிருத்துக்கு முத்தம் ஒன்றை கொடுத்து சர்ப்பிரைஸ் கொடுத்துள்ளார். இந்த படங்கள் இணையத்தில் வைரலாகி வருகின்றன.
இதன் பின்னர் பேசிய நடிகர் யோகி பாபு தெரிவித்ததாவது..
எனக்கு இந்த படத்தில் வாய்ப்பளித்த இயக்குநர் அட்லி, நடிகர் ஷாரூக்கான் இருவருக்கும் நன்றி. என்னை பார்த்தவுடன் சென்னை எக்ஸ்பிரஸ் படத்தை பற்றி பேசினார்.13 வருடம் கழித்து இன்னமும் என்னை ஞாபகம் வைத்துள்ளதற்கு ஷாருக்கானுக்கு நன்றி.
தெறி படத்தில் எனது காட்சிகளை தூக்கி விட்டனர். அதன் பிறகு தொடர்ந்து படம் தருகிறேன் என்று அட்லி சொன்னார். அதை செய்து காட்டினார். தமிழில் எப்படி ஒரு ஆளுமையோ இந்தியிலும் அட்லி ஆளுமைதான். ஹாலிவுட் செல்லுங்கள் அங்கேயும் ஆளுமை செய்வீர்கள். அட்லி ஹாலிவுட் போனால் அவருடன் நானும் சென்றுவிடுவேன். அனிருத் , விவேக் அனைவருக்கும் நன்றி.
