நியூசிலாந்து கிரிக்கெட் அணியின் முன்னாள் வீரர் கிறிஸ் கெய்ன்ஸுக்கு இதய அறுவைச் சிகிச்சை செய்யப்பட்டதை அடுத்து அவர் உடல் நிலை முன்னேறி வருகிறது.
நியூசிலாந்து கிரிக்கெட் அணியின் முன்னாள் வீரர் கிறிஸ் கெயின்ஸ். இவர், 1989 முதல் 2006 ஆம் ஆண்டு வரை, அந்த அணியின் முக்கிய ஆல்ரவுண்டராக விளங்கினார். 62 டெஸ்ட், 215 ஒருநாள் போட்டிகள், இரண்டு டி20 ஆட்டங்களில் பங்கேற்றுள்ள கெயின்ஸ், பல்வேறு போட்டிகளில் நியூசிலாந்து வெல்ல காரணமாக விளங்கியவர்.
கிரிக்கெட்டில் இருந்து ஓய்வு பெற்ற பிறகு இவர், லாரி பணிமனைகளையும் சுத்தம் செய்யும் பணியில் ஈடுபட்டு வந்தார். இந்நிலையில் ஆஸ்திரேலியாவுக்குச் சென்றிருந்த கிறிஸ் கெயின்ஸ், கடந்த சில நாட்களுக்கு முன் திடீரென மயங்கி விழுந்தார். இதையடுத்து கான் பெர்ரா மருத்துவமனையில் அவரை சேர்த்தனர்.
அவருக்கு இதய பிரச்னை காரணமாக சிகிச்சை அளிக்கப்பட்டு வந்தது. இருந்தாலும் அவர் உடல் நிலைக் கவலைக்கிடமாக இருப்பதாகக் கூறப்பட்டது. இந்நிலையில் சிட்னி மருத்துவமனையில் அவருக்கு இதய அறுவை சிகிச்சை செய்யப்பட்டதை அடுத்து அவர் உடல்நிலையில் முன்னேற்றம் ஏற்பட்டுள்ளதாக கிறிஸ் கெயின்ஸின் வழக்கறிஞர் தெரிவித்துள்ளார்.
