நடிகர் சூர்யாவின் பிறந்த நாளை முன்னிட்டு ”கங்குவா” திரைப்படத்தின் முதல் கிளிம்ப்ஸ் வீடியோ சமூக வலைதளங்களில் வைரலாகி வருகிறது.
தமிழ் சினிமாவின் முன்னணி நடிகரான சூர்யா தனது 48 வது பிறந்தநாளை இன்று கொண்டாடுகிறார். இதற்காக அவர் தற்போது நடித்து வரும் ‘கங்குவா’ படத்தின் முன்னோட்ட வீடியோவை பிரம்மாண்டமாக வெளியிட படக்குழுவினர் திட்டமிட்டனர். இது குறித்தான அதிகாரப்பூர்வ அறிவிப்பை தயாரிப்பு நிறுவனம் ஸ்பெஷல் போஸ்டருடன் வெளியிட்டது.
நேரடியாக கூகுள் செய்திகளிலிருந்து நியூஸ் 7 தமிழ், இணையதளத்தின் செய்திகளை உடனுக்குடன் பெற Google News பக்கத்தை Follow செய்யுங்கள்
தமிழ் சினிமாவின் அடுத்த பிரம்மாண்ட ரிலீசாக வெளியாக இருப்பது ‘கங்குவா’ படம். சூர்யா நடிப்பில் மிகப் பெரிய எதிர்பார்ப்புடன் உருவாகி வரும் இந்தப்படத்தை சிறுத்தை சிவா இயக்கி வருகிறார். தொடர்ச்சியாக பேமிலி டிராமா படங்களை இயக்கி கமர்ஷியல்ரீதியாக தொடர் வெற்றிகளை கொடுத்து வந்த இயக்குநர் சிவா, தற்போது முதன்முறையாக சூர்யாவுடன் கூட்டணி அமைத்துள்ள ‘கங்குவா’ படத்தினை தனது பாணியிலிருந்து முற்றிலும் வேறு விதமாக இயக்கி வருகிறார்.
3டி தொழில்நுட்பத்தில் பிரம்மாண்டமாக உருவாகி வரும் ‘கங்குவா’ படம் 10 மொழிகளில் தயாராகிறது. இதுவரை இல்லாத அளவிற்கு இரு மடங்கு பட்ஜெட்டில் இந்தப்படத்தினை ஸ்டுடியோ கிரீன் ஞானவேல் ராஜா தயாரித்து வருகிறார். அத்துடன் இந்தப்படத்தில் பல கெட்டப்களில் நடிக்கும் சூர்யா, இதற்காக உடல் எடையை அதிகரித்து மாஸ் லுக்கில் வலம் வருகிறார்.
இந்நிலையில் ‘கங்குவா’ படத்தின் முதல் கிளிம்ப்ஸ் வீடியோவை நள்ளிரவு 12.01 மணிக்கு ‘கங்குவா’ படத்தின் ”ஆழிக்குள் கொடிநட்ட மாறாக்கன் வழி வந்து… வேழத்தை விழ வச்ச கொச்சாமி வழிவந்து..” எனத்தொடங்கும் முதல் கிளிம்ப்ஸ் வீடியோ வெளியானது. இந்த வீடியோ வெளியாகிய 24 மணி நேரத்தில் 2.2 கோடி பார்வைகளை கடந்து தற்போது இணையதளங்களில் வைரலாகி வருகிறது. நடிகர் சூர்யாவின் ரசிகர்கள் அந்த கிளிம்ப்ஸ் வீடியோவை கொண்டாடி வருகின்றனர்.
